មន្ត្រីជាន់ខ្ពស់នៃក្រសួងកសិកម្មលើកឡើងថា ក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរ កម្ពុជានាំចូលបន្លែជាង១ពាន់តោន ដើម្បីផ្គត់ផ្គង់តម្រូវការក្នុងស្រុក។
ប្រធាននាយកដ្ឋានសាកវប្បកម្មនៃក្រសួងកសិកម្ម លោក គៀន សុភា មានប្រសាសន៍ប្រាប់ VOD ថាក្នុងមួយថ្ងៃៗនៃបុណ្យចូលឆ្នាំខ្មែរ កម្ពុជាត្រូវការបន្លែប្រមាណ៦០០តោន ក្នុងនោះនាំចូលជាង៦០ភាគរយ ដែលភាគច្រើនមកពីប្រទេសវៀតណាម។
លោកថា៖ «ខែមួយ យើងឃើញថា ការនាំចូលថយចុះ ព្រោះបន្លែក្នុងស្រុកច្រើន ហើយមួយទៀត ខែបួន ខែប្រាំ និងខែដប់ ព្រោះខែប្រាំង យើងខ្វះទឹក ហើយខែដប់ ទឹកលិចវិញ អត់មានអីដាំ។»
អ្នកបច្ចេកទេសទីផ្សារគ្រាប់ពូជ និងបន្លែនៃក្រុមហ៊ុន ម៉ាលីសាន លោក ឡុក គៀនស្រ៊ីន មានប្រសាសន៍ថា កសិករមួយចំនួនឈប់ដាំបន្លែ ងាកទៅដាំដំណាំផ្សេងវិញ ដោយសារលក់មិនចំណេញ។ លោកបន្តថា ការនាំចូលបន្លែជាង៥០ភាគរយនៃតម្រូវការនឹងបន្តរហូតដល់ដំណាច់ឆ្នាំ។
លោកបន្ថែមថា ការនាំចូលបន្លែជាងពាក់កណ្ដាលនៃការផ្គត់ផ្គង់នេះ កម្ពុជាត្រូវចំណាយប្រមាណ១០ម៉ឺនដុល្លារក្នុងមួយថ្ងៃ ដើម្បីទិញបន្លែពីប្រទេសដែលនាំចូល។
លោកថា៖ «ដោយសារខែនេះ កសិករមួយចំនួនគាត់នៅប្រមូលផលចុងដៃ អ៊ីចឹង ចាប់ពីចុងខែ៤ បានគាត់នាំចូលខ្ពស់ ដោយទីមួយ អាកាសធាតុក្ដៅ ហើយអ្វីដែលគាត់ដាំពីមុន វាអស់ហើយដែលអ្វីដែលគាត់ប្រមូលនៅពេលនេះ វានៅចុងដៃ តែគាត់នឹងចាប់ផ្ដើមបន្តទៀតនៅរដូវធ្លាក់ភ្លៀង។»
បើតាមលោក គៀនស្រ៊ីន បញ្ហាដែលកសិករជួបប្រទះនោះ មិនមែនមកពីបញ្ហាទឹកនោះទេ តែមកពីតម្លៃលក់មិនអាចឲ្យគាត់ចំណេញបាន ទើបកសិករជាច្រើនមិនចង់ដាំបន្លែលក់នោះ។
លោកជំរុញដល់រដ្ឋាភិបាលគួរតែមានវិធានការគ្រប់គ្រង ដល់ឈ្មួញកណ្ដាល ដើម្បីសម្រួលដល់តម្លៃមួយដែលអាចទទួលបានដល់កសិករ ខណៈកាត់បន្ថយថ្លៃដើមនៃការផលិតឲ្យតិចបំផុត ដើម្បីជំរុញទឹកចិត្តកសិករឲ្យដាំដុះបន្លែឲ្យបានច្រើន ដើម្បីផ្គត់ផ្គង់ក្នុងស្រុកបានគ្រប់គ្រាន់។
បើតាមក្រសួងកសិកម្ម បច្ចុប្បន្នមួយថ្ងៃៗកម្ពុជាត្រូវការបន្លែប្រមាណ៥០០ ទៅ៦០០តោន ក្នុងនោះដើមឆ្នាំនេះ កម្ពុជានាំចូលប្រមាណ៣០ភាគរយ ខណៈចាប់ពីពាក់កណ្ដាលឆ្នាំទៅតម្រូវការនាំចូលកើនឡើងដល់៥០ភាគរយនៃតម្រូវការសរុប៕