ក្រសួងសុខាភិបាល បានប្រកាសប្រមូលនូវឱសថលើសឈាម៤ប្រភេទដែលអាចបណ្ដាលឲ្យអ្នកប្រើប្រាស់កើតជំងឺមហារីក។
សេចក្តីជូនដំណឹងរបស់ក្រសួងសុខាភិបាលចេញកាលពីថ្ងៃទី១០ ខែមេសា ឲ្យដឹងថា ឱសថទាំង៤ប្រភេទនោះរួមមាន HYPERTEN Tablet, Losagen Tablet, LOSARTAS Tablet និង LANZAAR Tablet។ តាមប្រភពដដែលឱសថព្យាបាលជំងឺលើសសម្ពាធឈាមទាំង៤ប្រភេទមានផ្ទុកសារធាតុគីមី Nitrosamine Impurity លើសកម្រិតស្ដង់ដាដែលច្បាប់អនុញ្ញាត និងអាចបង្កឲ្យមានជំងឺមហារីក។
បើតាមសេចក្តីជូនដំណឹងរបស់ក្រសួងសុខាភិបាលដដែលនេះ មិនមានក្រុមហ៊ុនណាមួយនាំចូលឱសថទាំង៤ប្រភេទដោយស្របច្បាប់នោះទេ។
ប៉ុន្តែ បើតាមអ្នកនាំពាក្យក្រសួង សុខាភិបាល លោក លី សុវណ្ណ ឱសថទាំងនោះត្រូវបានក្រុមជនខិលខូចមួយចំនួនលួចនាំចូលធ្វើចរាចរណ៍ដោយខុសច្បាប់ក្នុងប្រទេសកម្ពុជា។
អ្នកនាំពាក្យរូបនេះ បានបញ្ជាក់ថា៖«ហ្នឹងហើយដូចយើងឃើញកន្លងមកហ្នឹង តែងតែមានអ្នកលួចនាំចូលដោយឥតចុះបញ្ជី។ យើងឥតត្រូវប្រើវា(ឱសថឱសថព្យាបាលជំងឺលើសសម្ពាធឈាមទាំង៤ប្រភេទ) សោះ ឥតត្រូវប្រើទេ។»
លោក លី សុវណ្ណ អះអាងថាក្រសួងសុខាភិបាល នឹងចាត់វិធានការតាមផ្លូវច្បាប់លើក្រុមហ៊ុន ឬបុគ្គលណាដែលនៅតែនាំចូល និងបន្តលក់ឱសថទាំង៤ប្រភេទខាងលើ ព្រោះថាវាជាឱសថដែលបង្កហានីភ័យដល់អ្នកប្រើប្រាស់។
តាមមាត្រា១០នៃច្បាប់ស្តីពីការគ្រប់គ្រងឱសថ បុគ្គលណាដែលលក់ឱសថគ្មានទិដ្ឋាការ ឬបញ្ជីការ ឬឱសថដែលក្រសួងសុខាភិបាលបានហាមឃាត់ត្រូវផ្តន្ទាទោសពិន័យជាប្រាក់ពី ១ ០០០០០០ (មួួយលានរៀល) ដល់ ១០ ០០០ ០០០ (ដប់លានរៀល) និងផ្អាកផលិតកម្ម អាហរ័ណនីហរ័ណកម្ម និងពាណិជ្ជកម្មឱសថពី ១ខែ ដល់៣ខែ ឬទោសណាមួយក្នុងចំណោមទោសទាំងពីរខាងលើដោយពុំទាន់គិតដល់ការផ្តន្ទាទោសពីបទល្មើសផ្សេងៗទៀត។
មាត្រា១០នៃច្បាប់ដដែលនេះ បញ្ជាក់ថាក្រសួងសុខាភិបាលមានសិទ្ធិផ្អាកជាបណ្ដោះអាសន្នភ្លាមនូវ ការផ្សព្វផ្សាយឱសថ អាហរ័ណនីហរ័ណកម្ម និងពាណិជ្ជកម្មឱសថដែលល្មើសរួចរៀបចំសំណុំរឿងបញ្ជូនទៅតុលាការ។
តាមសេចក្តីជូនដំណឹងដដែល ក្រសួងសុខាភិបាល អះអាងថានឹងបន្តធ្វើការត្រួតពិនិត្យ និងតាមដានជាបន្តទៀតជុំវិញបញ្ហានេះ។ ក្រសួង ក៏បានអំពាវនាវឲ្យពលរដ្ឋរាយការណ៍ទៅកាន់ស្ថាប័នរបស់ខ្លួន ប្រសិនបើពួកគាត់ជួបឬប្រទះឃើញឱសថទាំង៤ប្រភេទខាងលើចរាចរណ៍ តាមរយៈទូរស័ព្ទ ០១១ ៥៧៤ ៧៨៧, ០១២ ៩៨៣ ៣៣៤, ០១៧ ៦០៦ ៦៧០ និង ០១៧ ៨៦៦ ៧៦០៕