លោក សម រង្ស៊ី អតីតមេដឹកនាំគណបក្សសង្រ្គោះជាតិ ថ្លែងក្នុងសន្និសិទក្នុងទីក្រុងក្វាងជូ ប្រទេសកូរ៉េខាងត្បូង នៅល្ងាចថ្ងៃសុក្រ ទី១៩ ខែមេសានេះ ថា ជំនួបនៅកូរ៉េខាងត្បូងនេះនឹងនាំឲ្យមានការពិភាក្សាអំពីផែនការស្តារសេរីភាព យុត្តិធម៌ និងការរីកចម្រើននៅក្នុងប្រទេសកម្ពុជា។
លោក សម រង្ស៊ី មានប្រសាសន៍ថា៖ «ការមកជួបជុំរបស់យើងនៅថ្ងៃនេះ និងថ្ងៃស្អេក នៅទីក្រុងក្វាងជូ នឹងផ្តល់ឲ្យយើងនូវឱកាសដ៏ពិសេស ពិភាក្សាអំពីផែនការរបស់យើង ដើម្បីធ្វើឲ្យសម្រេចបាននូវក្តីសុបិន្តរបស់យើង ដើម្បីបង្កើតនូវសង្គមកម្ពុជាមួយដែលមានសេរីភាព យុត្តិធម៌ និងការរីកចម្រើន។»
លោក សម រង្ស៊ី អតីតមេដឹកនាំ និងអតីតមន្រ្តីគណបក្សសង្រោះជាតិច្រើនរូបទៀត និងអ្នកគាំទ្រក្នុងប្រទេសកូរ៉េខាងត្បូង រួមនិងតំណាងអង្គការសង្គមស៊ីវិលមួយចំនួន និងអ្នកវិភាគបានបង្ហាញវត្តមាននៅក្នុងសន្និសិទមួយ នៅទីក្រុងក្វាងជូ ដែលផ្សាយផ្ទាល់តាមបណ្តាញទំនាក់ទំនងសង្គមនៅរសៀលថ្ងៃសុក្រ ទី១៩ ខែមេសានេះ។
បើតាមទំព័រហ្វេសប៊ុករបស់លោក យឺម ស៊ីណន ប្រធានចលនាយុវជនគណបក្សសង្រ្គោះជាតិនៅប្រទេសកូរ៉េខាងត្បូង ឲ្យដឹងថា សន្និសីទនេះធ្វើឡើងនៅថ្ងៃទី១៩ និងថ្ងៃទី២០ ខែមេសានេះ។ សកម្មជនគណបក្សសង្គ្រោះជាតិមួយចំនួនក៏អះអាងថា ក្រៅតែពីចូលរួមសមាជអ្នកប្រជាធិបតេយ្យ លោក សម រង្ស៊ី និងអតីតមន្រ្តី និងអ្នកគាំទ្រគណបក្សសង្គ្រោះជាតិក៏នឹងធ្វើបាតុកម្មភ្លើងទៀនជាលើកទី២ផងដែរ។
ពលករខ្មែរដែលធ្វើការនៅប្រទេសកូរ៉េខាងត្បូងប្រមាណជាប្រាំពាន់នាក់ បានធ្វើបាតុកម្មតវ៉ាប្រឆាំងនឹងការបោះឆ្នោតនៅប្រទេសកម្ពុជាកាលពីថ្ងៃទី២៤ ខែកក្កដា ឆ្នាំ២០១៨ គឺបួនថ្ងៃមុនពេលបោះឆ្នោតនៅក្នុងប្រទេសកម្ពុជា ដោយមិនមានវត្តមានគណកប្សសង្គ្រោះជាតិ។
មន្រ្តីកម្ពុជាធ្លាប់បានអះអាងថា ប្រជាពលរដ្ឋខ្មែរប្រមាណជាជាងប្រាំមួយម៉ឺននាក់កំពុងតែរស់នៅសាធារណរដ្ឋកូរ៉។ ក្នុងចំណោមប្រជាពលរដ្ឋខ្មែរទាំងនោះ ប្រហែលជា៤០០នាក់ គឺជានិស្សិតដែលទៅសិក្សានៅប្រទេសកូរ៉េខាងត្បូង និងក្រៅពីនោះគឺជាពលករដែលធ្វើការនៅក្នុងវិស័យសំណង់ កសិកម្ម និងឧស្សាហកម្មខ្នាតតូច និងមធ្យម។
អ្នកវិភាគនយោបាយនៅកម្ពុជាដែលកំពុងរស់នៅនិរទេសខ្លួននៅក្រៅប្រទេស លោក គឹម សុខ ថ្លែងក្នុងសន្និសិទនៅក្នុងទីក្រុងក្វាងជូ ប្រទេសកូរ៉េខាងត្បូងនៅល្ងាចថ្ងៃសុក្រ ទី១៩ ខែមេសានេះ ដោយលើកឡើងថា មានតែប្រជាពលរដ្ឋខ្មែរទេដែលអាចនឹងស្តារប្រជាធិបតេយ្យនៅក្នុងប្រទេសឡើងវិញបាន។
លោកមានប្រសាសន៍ថា៖ «តាមរយៈសន្និសីទនេះ ខ្ញុំសូមផ្សព្វផ្សាយនូវសារទៅពលរដ្ឋខ្មែរនៅក្នុងប្រទេសកម្ពុជា និងនៅគ្រប់ទីកន្លែងនៅក្នុងពិភពលោក ដែលថាប្រទេសដែលក្រីក្ររបស់យើង ពិតជាត្រូវការយើង ឬអ្នកដែលចូលរួមក្នុងគណបក្សនយោបាយឲ្យក្រោកឈរឡើងទាំងអស់គ្នា រួមដៃគ្នា ដើម្បីឲ្យមានសម្លេងខ្លាំង ដើម្បីសង្គ្រោះប្រទេសកម្ពុជាឲ្យមានប្រជាធិបតេយ្យឡើងវិញ។»
នាយកប្រតិបត្តិអង្គការតម្លាភាពកម្ពុជា លោក ព្រាប កុល ដែលត្រូវបានអញ្ជើញទៅចូលរួមនៅក្នុងសន្និសីទសន្តិភាព និងសិទ្ធិមនុស្សក្រុងក្វាងជូ ប្រទេសកូរ៉េខាងត្បូង ប្រាប់ VOD តាមសារអេឡិចត្រូនិច ថា លោកនឹងចូលរួមនៅក្នុងសន្និសីទ និងសមាជ ដើម្បីជជែកពិភាក្សាស្វែងរកដំណោះស្រាយបញ្ហាជម្លោះនយោបាយកម្ពុជា។ លោកបន្តថា លោកក៏នឹងពិភាក្សាអំពីវប្បធម៌នយោបាយថ្មីសម្រាប់កម្ពុជាផងដែរ។
លោក ព្រាប កុល មានប្រសាសន៍ថា៖ «យើងនឹងជជែកគ្នាអំពីប្រធានបទនេះ នៅក្នុងសមាជអ្នកប្រជាធិបតេយ្យនៅថ្ងៃទី២០-២១ បន្ទាប់មក យើងរំពឹងថា នឹងមានក្តីសម្រេចមួយអំពីដំណោះស្រាយ។ ខ្ញុំរំពឹងថា សេចក្តីសម្រេចនៃសមាជ និងក្លាយជាឯកសារយោង និងជាត្រីវិស័យ ដើម្បីនាំទៅរកការបង្កើតយន្តការនានា ដែលស្វែងរកដំណោះស្រាយនយោបាយបច្ចុប្បន្នផង និងសម្រាប់ការបង្កើតវប្បធម៌នយោបាយថ្មីផង។»
យោងតាមលោក ព្រាប កុល សមាជអ្នកប្រជាធិបតេយ្យដែលលោកចូលរួមនោះ គឺជាវេទិកាសម្រាប់ការជជែកគ្នារវាងអ្នកប្រជាធិបតេយ្យដែលមានសមាសភាពជាអ្នកនយោបាយ សង្គមស៊ីវិល អ្នកវិភាគ និងបុគ្គលឯករាជ្យ។
សហភាពអឺរ៉ុប កាលពីខែកុម្ភៈ ឆ្នាំ២០១៩នេះ បានប្រកាសរាប់ថ្ងៃថយក្រោយលើវិធានការរបស់ខ្លួន ដែលអាចឈានទៅព្យួរជាបណ្តោះអាសន្ននូវប្រព័ន្ធអនុគ្រោះពន្ធពាណិជ្ជកម្ម EBA ពីកម្ពុជា ក្រោយពីប្លុកលោកសេរីមួយនេះរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យ។ ដូចគ្នានេះដែរ សមាជិកសភាអាមេរិកក៏អះអាងដែរថា ពួកគេកំពុងជំរុញច្បាប់ឱ្យរដ្ឋបាលប្រធានាធិបតី ដូណាល់ ត្រាំ ផ្អាកការអនុគ្រោះពាណិជ្ជកម្ម GSP ដោយសារ បញ្ហារំលោភសិទ្ធិមនុស្ស មិនបើកផ្លូវឲ្យអតីតគណបក្សប្រឆាំងបានដំណើរការឡើងវិញ និងដោះលែងលោក កឹម សុខា ជាដើម។
ក្រុមអ្នកបញ្ជាទិញអន្តរជាតិផ្នែកផលិតផលកាត់ដេរពីកម្ពុជា បានបង្ហាញក្ដីបារម្ភរបស់ពួកគេអំពីការបាត់បង់ប្រព័ន្ធអនុគ្រោះពន្ធ EBA របស់អឺរ៉ុប និង GSP របស់អាមេរិក។ ពួកគេលើកឡើងថា វានឹងធ្វើឲ្យប៉ះពាល់ធ្ងន់ធ្ងរដល់ឧស្សាហកម្មកាត់ដេរកម្ពុជា រួមទាំងពលរដ្ឋខ្មែររាប់លាននាក់ដែលទទួលផលពីវិស័យនេះ។
លោក កឹម សុខា ប្រធានគណបក្សសង្រ្គោះជាតិ ត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ដោយចោទពីបទក្បត់ជាតិ។ តុលាការកំពូលក្នុងប្រទេសកម្ពុជា បានសម្រេចរំលាយគណបក្សសង្រ្គោះជាតិកាលពីឆ្នាំ២០១៧។ មន្ត្រីជាន់ខ្ពស់របស់គណបក្សសង្រ្គោះជាតិ១១៨នាក់ ក៏ត្រូវបានតុលាការសម្រេចហាមឃាត់សិទ្ធិនយោបាយរយៈពេល៥ឆ្នាំផងដែរ។
លោកស្រី មូរ សុខហួរ អតីតអនុប្រធានគណបក្សសង្រ្គោះជាតិ សរសេរក្នុងទំព័រហ្វេសប៊ុករបស់លោកស្រីនៅថ្ងៃនេះថា លោក សម រង្ស៊ីនឹងបន្តដំណើរមកកាន់ប្រទេសកម្ពុជាវិញនៅពេលឆាប់ៗនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មិនអាចទាក់ទងសុំការអត្ថាធិប្បាយបានទេនៅថ្ងៃនេះ ដោយលោកប្រាប់ថាជាប់រវល់។ ទោះយ៉ាងណា សារព័ត៌មានក្នុងស្រុកបានដកស្រង់សំដីរបស់លោកមកចុះផ្សាយថា ពលករខ្មែរដែលធ្វើការនៅប្រទេសកូរ៉េចូលរួមមហាបាតុកម្ម ជាមួយបក្សប្រឆាំង អាចនឹងឈប់ទទួលបានទិដ្ឋាការ ទៅធ្វើការនៅកូរ៉េ បើសិនជាពួកគេជេរប្រមាថ និងប្រើពាក្យអសុរោះ មកលើរាជរដ្ឋាភិបាល ។
ពលរដ្ឋខ្មែរដែលគាំទ្រគណបក្សសង្គ្រោះជាតិនៅក្នុងប្រទេសជប៉ុនក៏បានធ្វើបាតុកម្ម ជម្រុញទៅរដ្ឋាផិបាលជប៉ុនដកការគាំទ្ររបស់ខ្លួនចំពោះការបោះឆ្នោតនៅក្នុងប្រទេសកម្ពុជាផងដែរ កាលពីខែមិនា ឆ្នាំ២០១៨។ យោងតាមក្រសួងការងារ និងបណ្តុះបណ្តាលវិជ្ជាជីវៈ ឲ្យដឹងថា យ៉ាងហោចណាស់មានពលករខ្មែរប្រមាណជា៩០០០នាក់កំពុងធ្វើការនៅក្នុងប្រទេសជប៉ុន៕