សមត្ថកិច្ចវៀតណាមចាប់បានគ្រឿងញៀនជាង១តោន ដែលប៉ុនប៉ងនាំចូលក្នុងប្រទេសនេះ តាមរយៈបុរសជនជាតិតៃវ៉ាន់២នាក់ និងជនជាតិវៀតណាមម្នាក់។
សមត្ថកិច្ចចាប់បានគ្រឿងញៀននេះ ដែលបង្កប់ក្នុងឧបករណ៍បំពងសំឡេង (Loudspeakhers) ចំនួន១០៣ ស្មើនឹង១១១0គីឡូក្រាម ជាប្រភេទមេតំហ្វេតាមីន ប៉ុនប៉ងដឹកចូលទីក្រុងហាណូយ។ គ្រឿងញៀនទាំងនេះដឹកជញ្ជូនតាមរថយន្តបើកបរដោយជនជាតិតៃវ៉ាន់ពីរនាក់ សមត្ថកិច្ចសង្ស័យជាទំនិញខុសច្បាប់ ហើយអ្នកបើកបរមិនមានឯកសារ ទើបត្រួតពិនិត្យរកឃើញថា មានគ្រឿងញៀន។ នេះបើតាមទីភ្នាក់ងារព័ត៌មានAFP។
សមត្ថកិច្ចវៀតណាមបានឃាត់ខ្លួនជនសង្ស័យទាំងបីនាក់ គឺជនជាតិតៃវ៉ានពីរនាក់ និងវៀតណាមម្នាក់ ហើយបន្តស្រាវជ្រាវរកអ្នកពាក់ព័ន្ធផ្សេងទៀត។
ភាគច្រើនគ្រឿងញៀនដែលលួចនាំចូលទៅវៀតណាម គឺមានប្រភពពីតំបន់ត្រីកោណមាស ជាតំបន់ព្រំដែនប្រសព្វគ្នារវាងប្រទេសថៃ ឡាវ និងមីយ៉ាន់ម៉ា។
វៀតណាម គឺជាប្រទេសដែលមានច្បាប់តឹងរ៉ឹងចំពោះគ្រឿងញៀន គឺបើរកឃើញអ្នករត់ពន្ធគ្រឿងញៀនប្រភេទហេរ៉ូអ៊ីន៦០០ក្រាម ឬប្រភេទមេតំហ្វេតាមីន២គីឡូកន្លះ នឹងត្រូវកាត់ទោសប្រហារជីវិត។
