មនុស្សដល់ទៅ ១៥៦នាក់ហើយ ត្រូវបានរាយការណ៍ថា បានស្លាប់ ក្នុងនោះមានទាំងជនបរទេស ៣៥នាក់ផងដែរ ក្រោយការវាយប្រហារជាបន្តបន្ទាប់សំដៅទៅលើសណ្ឋាគារ និងវិហារនានានៅក្នុងប្រទេសស្រីលង្កានៅថ្ងៃនេះ។ នេះបើតាមការចុះផ្សាយរបស់សារព័ត៌មានអន្តរជាតិ។
ទីភ្នាក់ងារព័ត៌មាន AFP របស់បារាំងដែលបានដកស្រង់សម្ដីមន្ត្រីនគរបាលស្រីលង្កា បានចុះផ្សាយថា មនុស្សយ៉ាងហោចណាស់ ៤៥នាក់ ត្រូវបានសម្លាប់នៅក្នុងការវាយប្រហាទៅលើសណ្ឋាគារ និងវិហារនៅរដ្ឋធានីកូឡុំបូ នៅថ្ងៃអាទិត្យនេះ។
បើតាមសេចក្ដីរាយការណ៍ដដែលនេះ មនុស្ស ៧៦នាក់ ត្រូវបានសម្លាប់នៅក្នុងការវាយប្រហារមួយទៅលើវិហារមួយស្ថិតនៅភាគខាងជើងរដ្ឋធានីកូឡុំបូ ហើយមនុស្ស ២៥នាក់ទៀត បានស្លាប់នៅក្នុងវិហារមួយកន្លែងស្ថិតនៅតំបន់ Batticoloa ស្ថិតនៅភាគខាងកើតប្រទេស។
AFP បានចុះផ្សាយបន្តថា យ៉ាងហោចណាស់មនុស្ស ១៦០នាក់ បានរងរបួសនៅក្នុងការវាយប្រហារមួយទៅលើវិហារ St. Anthony នៅព្រឹកថ្ងៃនេះផងដែរ។
ចំនួនមនុស្សរងរបួសនៅក្នុងការវាយប្រហារជាបន្តបន្ទាប់នៅថ្ងៃនេះ ត្រូវបានប៉ាន់ប្រមាណថា បានកើនឡើងលើសចំនួន ៣០០នាក់ហើយ។
គ្មានក្រុមណាមួយប្រកាសទទួលខុសត្រូវចំពោះការវាយប្រហារទាំងនេះទេ ហើយប្រធានាធិបតីស្រីលង្កា លោក Maithripala Sirisena បានបញ្ជាទៅកងកម្លាំងនគរបាលពិសេស និងយោធា ឲ្យស៊ើបអង្កេតរកអ្នកនៅពីក្រោយផែនការនៃការវាយប្រហារដ៏បង្ហូរឈាមនេះ។
បើតាមការផ្សាយនៃសារព័ត៌មានអន្តរជាតិនានា សន្តិសុខនៅក្នុងប្រទេសដែនដីកោះមួយនេះ កំពុងត្រូវបានរឹតបន្តឹងនៅតាមព្រលានយន្តហោះ នៅក្រោយការវាយប្រហារជាបន្តបន្ទាប់នៅថ្ងៃនេះ៕