អង្គការសុខភាពសត្វពិភពលោក បានប្រកាសថា មន្ត្រីកសិកម្មបានរកឃើញករណីផ្ទុះជំងឺផ្ដាសាយបក្សី H5N6 ជាលើកដំបូងនៅក្នុងខេត្តតាកែវ ភាគខាងត្បូងប្រទេសកម្ពុជា។
ក្នុងប្រព័ន្ធព័ត៌មានរបស់ខ្លួន អង្គការសុខភាពសត្វពិភពលោក បានបញ្ជាក់ថា ស្ថាប័នមួយនេះទទួលបានព័ត៌មានអំពីករណីផ្ទុះជំងឺផ្ដាសាយបក្សីប្រភេទ H5N6 ជាលើកដំបូងពីលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្ម នៃក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៨ ខែមេសាកន្លងមកថ្មីៗនេះ។
បើតាមអង្គការមួយនេះ ករណីផ្ទុះជំងឺផ្ដាសាយបក្សីប្រភេទ H5N6 បានកើតឡើងតាំងពីថ្ងៃទី២៥ ខែមីនា ហើយត្រូវបានបញ្ជាក់អំពីករណីនេះនៅរយៈពេល ២ថ្ងៃក្រោយមក។
ស្ថាប័នសុខភាពសត្វពិភពលោកមួយនេះ បានឲ្យដឹងថា ករណីផ្ទុះជំងឺផ្ដាសាយបក្សីប្រភេទ H5N6 នេះ ត្រូវបានរកឃើញនៅក្នុងបក្សចិញ្ចឹមនៅក្នុងផ្សារដូនកែវ ស្ថិតក្នុងក្រុងដូនកែវ ខេត្តតាកែវ តាមរយៈការត្រួតពិនិត្យសុខភាពសត្វចិញ្ចឹមពីសំណាក់វិទ្យាស្ថានជាតិស្រាវជ្រាវសុខភាពសត្វ និងផលិតកម្ម។
បើតាមសេចក្ដីប្រកាសព័ត៌មានរបស់អង្គការសុខភាពសត្វពិភពលោក វីរុស H5N6 នេះគឺជាប្រភេទវីរុសដែលងាយចម្លងមេរោគខ្ពស់បំផុត ប៉ុន្ដែ អះអាងថា មិនមានមនុស្សណាម្នាក់បានឆ្លងមេរោគនេះនោះទេ។
សេចក្ដីប្រកាសព័ត៌មានបន្ដទៀតថា មន្ដ្រីជំនាញក៏បានមានវិធានគ្រប់គ្រង និងទប់ស្កាត់មួយចំនួន ពាក់ព័ន្ធនឹងការផ្ទុះឡើង នៃវីរុសប្រភេទ H5N6 នេះ៕