លោកនាយករដ្ឋមន្ត្រី ហ៊ុន សែន បានលើកឡើងថា វាជារឿងដែលមិនអាចទៅរួចទេ ដែលលោក ស ខេង ធ្វើរដ្ឋប្រហារទម្លាក់រូបលោក ដើម្បីយកអំណាចទៅឱ្យអ្នកដទៃនោះទេ។
ថ្លែងក្នុងពិធីបើកការដ្ឋានសាងសង់អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ ពីក្រុងប៉ោយប៉ែត នៅថ្ងៃនេះ លោក ហ៊ុន សែន បានផ្ញើសារទៅកាន់ដៃគូប្រឆាំងរបស់ខ្លួនថា អនុប្រធានគណបក្សរបស់ខ្លួន និងជារដ្ឋមន្ត្រីក្រសួងមហាផ្ទៃ លោក ស ខេង មិនល្ងង់ដល់ថ្នាក់ធ្វើរដ្ឋប្រហារ និងបក្សប្រហារទម្លាក់លោកចេញពីតំណែង ហើយយកអំណោចឱ្យមេបក្សប្រឆាំងនោះទេ។
លោកថា ការធ្វើរដ្ឋប្រហារណាមួយ នឹងនាំកម្ពុជាទៅរកវិបត្តិនៃសង្គ្រាមតែម្តង និងគ្មានឡើយសន្តិភាពសម្រាប់ប្រទេសមួយនេះ។
លោកមានប្រសាសន៍ថា៖ «ឥលូវយើងសាកគិតជាមួយគ្នាមើល! ឧបនាយករដ្ឋមន្ត្រីផ្តួលនាយករដ្ឋមន្ត្រី មានន័យស្មើនឹងអី? មានន័យស្មើនឹងរដ្ឋប្រហារ ចេះប្រើគេទៅរួច ហើយរដ្ឋប្រហារហើយយកអំណាចទៅឱ្យពីណា? យកអំណាចទៅឱ្យវា នឹកស្មានតែសម្តេចក្រឡាហោមល្ងង់ណាស់ទៅអី។ អ៊ីចឹង! មិនបាច់សម្តេចក្រឡាហោមឆ្លើយតបទេ ព្រោះយើងបានឯកភាពគ្នាហើយ ថ្ងៃមុនចូលទៅប្រជុំគណៈរដ្ឋមន្ត្រី ខ្ញុំថា មិនបាច់ឆ្លើយជាមួយវាទេ។»
កាលពីថ្ងៃទី១ ខែមេសា អតីតប្រធានគណបក្សសង្រ្គោះជាតិដែលកំពុងនិរទេសខ្លួននៅក្រៅប្រទេស លោក សម រង្ស៊ី បានបង្ហោះវីដេអូឃ្លីបមួយអមដោយសំណេរចោទជាសំណួរថា តើរវាងគូរប្រកួត លោក ហ៊ុន សែន និងលោក ស ខេង តើនរណាហ៊ានវាយមុន?
លោកសម រង្ស៊ីថា សម្រាប់បក្សសង្រ្គោះជាតិ គឺគាំទ្រលោក ស ខេង ពេញទំហឹងដើម្បីកម្ចាត់លោក ហ៊ុន សែន ដោយថា មន្ត្រីធំៗក្នុងជួរដ្ឋាភិបាលជាច្រើន គេមិនសប្បាយចិត្តនឹងត្រកូល ហ៊ុន ឡើយ ហើយពួកគេរង់ចាំតែឱកាសមកដល់ប៉ុណ្ណោះ។
លោកថា៖ «ឥលូវក្រុមគ្រួសារលោក ហ៊ុន សែន ដល់ទីបញ្ចប់ហើយ ចាំតែផ្ទុះទេបងប្អូនៗ។ ក្នុងប៉ុន្មាន នរណាហ៊ានវ៉ៃមុន យើងអត់មានកម្លាំងវ៉ៃទេ តែជឿថាគ្នាគេហ្នឹង នរណាវ៉ៃមុន អ្នកហ្នឹងឈ្នះហើយ។ កុំឱ្យគេវ៉ៃមុន តែគេវ៉ៃមុន អត់ស្រួលទេ។ ដូចក្រុម ស ខេង ឥលូវ ក្រុម ហ៊ុន សែន មើលមុខគ្នាអត់ចំទេ។ ត្រូវតែប្រាប់ពួកហ្នឹង ថានរណាទម្លាក់ ហ៊ុន សែន យើងគាំទ្រ មិនមែនឯកោទេ ហ៊ុន សែន ទៅវិញទេ ឯកោ ហើយកុំឱ្យ ហ៊ុន សែន វ៉ៃមុន វៃមុនទៅ។»
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី មានប្រសាសន៍ថា ការផ្លាស់ប្តូរណាមួយដែលនាំកម្ពុជាទៅរកអំពើហិង្សា ឬសង្គ្រាមនោះ នឹងនាំកម្ពុជាឱ្យដើរថយក្រោយទៅរកសម័យកាល១០ ទៅ២០ឆ្នាំមុនវិញជាក់ជាមិនខាន។
លោកមានប្រសាសន៍ថា៖ «ជារឿងមួយដែលខ្មែរកុំនាំគ្នាយល់សប្តិ ក្នុងការដើរទៅរកការបង្កឱ្យមានអំពើហិង្សាជាបន្ត។ ការបង្កប្រឈមដាក់គ្នារវាងកម្លាំងប្រដាប់អាវុធឡើងវិញ។ នេះជារឿងសំខាន់ដែលខ្មែរត្រូវបញ្ចៀសបាន ហើយការដោះស្រាយ ឬការផ្លាស់ប្តូរជាវិជ្ជមាន ដែលពលរដ្ឋទទួលយកបាន ទាំងគូបដិបក្ខអ្នកនយោបាយអាចទទួលយកបាន។ ហើយជៀសវាងនាំគ្នាបណ្តុះនូវវប្បធម៌ទឹកឡើងត្រីស៊ីស្រមោច ខ្ញុំគិតថា នឹងធ្វើឱ្យមានភាពធូរស្រាលជាមួយគ្នាឡើងវិញ។»
លោកបណ្ឌិត មាស នី មើលឃើញថា ចាប់តាំងពីគណបក្សសង្រ្គោះជាតិត្រូវបានគេរំលាយចោលកាលពីចុងឆ្នាំ២០១៧ ស្ថានភាពនយោបាយបច្ចុប្បន្ន រដ្ឋាភិបាលប្រៀបដូចនឹងអូសរទេះឡើងភ្នំផងដែរ។
កាលពីថ្ងៃទី២០ ខែមេសា ក្នុងពិធីបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តមួយក្នុងខេត្តព្រៃវែង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង អំពាវនាវឲ្យប្រជាពលរដ្ឋ ចូលរួមថែរក្សាសន្តិភាពកុំចូលរួមធ្វើបដិវត្តន៍ពណ៌ផ្តួលរំលំរដ្ឋាភិបាល។
យ៉ាងនេះក្តី លោក ស ខេង ទទួលស្គាល់ថា ក្រោមការដឹកនាំរបស់លោក ហ៊ុន សែន បច្ចុប្បន្នមានកំហុសខ្លះមែន ហើយថា កំហុសទាំងនេះអាចកែសម្រួលបាន មិនធ្ងន់ធ្ងរដែលត្រូវឱ្យផ្តួលរំលំទេ ហើយកំហុសទាំងនោះក៏មិនធ្ងន់ធ្ងរដូចរបបខ្មែរក្រហមនោះដែរ៕