យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ឲ្យដឹងនៅថ្ងៃច័ន្ទនេះថា តបតាមការអញ្ជើញរបស់ប្រធានាធិបតីចិន លោក ស៊ី ជីនពីង លោកនាយករដ្ឋមន្រ្តី ហ៊ុន សែន នឹងដឹកនាំគណៈប្រតិភូជាន់ខ្ពស់កម្ពុជា ដើម្បីចូលរួមនៅក្នុងវេទិកា «ខ្សែក្រវ៉ាត់ និងផ្លូវ» លើកទី២ សម្រាប់កិច្ចសហប្រតិបត្តិការអន្តរជាតិ និងកិច្ចប្រជុំសំខាន់ផ្សេងទៀត នៅទីក្រុងប៉េកាំង ប្រទេសចិន ចាប់ពីថ្ងៃទី២៥ ដល់ថ្ងៃទី២៩ ខែមេសានេះ។
សេចក្តីប្រកាសព័ត៌មានឲ្យដឹងបន្តថា ឧបនាយករដ្ឋមន្រ្តី ទេសរដ្ឋមន្រ្តី និងរដ្ឋមន្រ្តីចំនួន៨រូប នឹងចូលរួមនៅក្នុងវេទិកានោះផងដែរ ដែលរួមមាន លោកឧបនាយករដ្ឋមន្រ្តី ហោ ណាំហុង លោក ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ លោក ឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន លោក វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម លោក ម៉ម ប៊ុនហេង រដ្ឋមន្រ្តីក្រសួងសុខាភិបាល លោក ថោង ខុន រដ្ឋមន្រ្តីក្រសួងទេសចរណ៍ និងសមាជិករដ្ឋាភិបាលផ្សេងទៀត។
បើយោងតាមសេចក្តីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិដដែលនេះឲ្យដឹងដែរថា នៅក្នុងវេទិកានោះ លោកនាយករដ្ឋមន្រ្តី ហ៊ុន សែន ក៏នឹងថ្លែងសុន្ទរកថាអំពីមូលបទរបស់វេទិកា «កិច្ចសហប្រតិបត្តិការខ្សែក្រវ៉ាត់និងផ្លូវ អំពីការបង្កើតជោគវាសនាដ៏ត្រចះត្រចង់» និងការជម្រុញការតភ្ជាប់ ដើម្បីស្វែងរកធនធានថ្មីសម្រាប់ការរីកចម្រើន។ សេចក្តីប្រកាសបន្តថា លោកនាយករដ្ឋមន្រ្តីក៏នឹងចូលរួមនៅក្នុងពិធីបើកពិព័រណ៍សាកវប្បកម្មអន្តរជាតិ២០១៩ និងសម្ពោពន្លាជាតិរបស់កម្ពុជា។
តាមសេចក្តីប្រកាសព័ត៌មាន លោកនាយករដ្ឋមន្រ្តី ហ៊ុន សែន នឹងជួបទ្វេភាគីជាមួយនឹងប្រធានាធិបតីចិន ស៊ី ជីនពីង នាយករដ្ឋមន្រ្តីចិន លី ឃឹឈាង និងលោក វ៉ាង ហ៊ុននីង សមាជិកការិយាល័យនយោបាយ និងជាលេខានៃលេខាធិការដ្ឋានបក្សកុម្មុយនីស្តចិន។ សេចក្តីប្រកាសបន្តថា លោកនាយករដ្ឋមន្រ្តី ហ៊ុន សែន ក៏នឹងជួបផងដែរជាមួយនឹងលោក លី យ៉ុង អគ្គនាយកអង្គការឧស្សាហកម្មអង្គការសហប្រជាជាតិ និងជួបជាមួយនឹងតំណាងក្រុមហ៊ុនចិនមួយចំនួនទៀត។ បើតាមសេចក្តីប្រកាសព័ត៌មានដដែលនេះបញ្ជាក់ទៀតថា ក្នុងដំណើរទស្សនកិច្ចនេះ អាចនឹងមានការចុះហេត្ថលេខាលើឯកសារមួយចំនួនស្តីពីជំនួយរបស់ចិន ព្រមទាំងគម្រោងកិច្ចសហប្រតិបត្តិការនានា។
គិតត្រឹមឆមាសទី១ នៃឆ្នាំ២០១៨ ចិន ជាម្ចាស់បំណុលធំបំផុតរបស់កម្ពុជា ដែលមានចំនួនដល់ទៅជិត ៧ពាន់លានដុល្លារ ឬបានកាន់កាប់ចំណែកបំណុលកម្ពុជាដល់ទៅជាង ៤២ភាគរយ ក្នុងចំណោមបំណុលសរុបដែលកម្ពុជាជំពាក់បរទេស។
អំឡុងដំណើរទស្សនកិច្ចផ្លូវការទៅកាន់ប្រទេសចិនកាលពីខែមករា ដើមឆ្នាំ២០១៩នេះ លោកនាយករដ្ឋមន្ត្រី ហ៊ុន សែន បានអះអាងថា រូបលោកផ្ទាល់ និងប្រធានាធិបតីចិន លោក ស៊ី ជីនពីង បានប្ដេជ្ញាបង្កើនទំហំពាណិជ្ជកម្មទ្វេភាគីឲ្យដល់ចំនួន១០ពាន់លានដុល្លារនៅត្រឹមឆ្នាំ២០២៣ខាងមុខ។
នៅក្នុងសប្តាហ៍មុននេះ អាមេរិក និងចិន ដែលជាប្រទេសមហាអំណាចសេដ្ឋកិច្ចលំដាប់ទី១ និងទី២ បានកំពុងប្រើពាក្យសម្តីវាយប្រហារគ្នាទៅវិញទៅមក ជុំវិញទំនាក់ទំនងពាណិជ្ជកម្មរវាងប្រទេសទាំងពីរជាមួយកម្ពុជា។
ស្ថានទូតសហរដ្ឋអាមេរិកប្រចាំកម្ពុជា បានសរសេរលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី១៩ ខែមេសា ថាប្រទេសចិនជាដៃគូពាណិជ្ជកម្មធំជាងគេរបស់ប្រទេសកម្ពុជា តែទំនាក់ទំនងនេះចំណេញខ្លាំងទៅខាងប្រទេសចិន។ ជាការឆ្លើយតបស្ថានទូតចិនប្រចាំកម្ពុជា បានសរសេរលើទំព័រហ្វេសប៊ុករបស់ខ្លួនថា អាមេរិកកំពុងតែបង្កបញ្ហាម្តងទៀតជាមួយនឹងអ្វីដែលគេហៅថាឱនភាពពាណិជ្ជកម្ម។
នៅថ្ងៃច័ន្ទនេះ ស្ថានទូតអាមេរិកប្រចាំកម្ពុជាបានសរសេរសារមួយថ្មីទៀតនៅលើទំព័រហ្វេសប៊ុករបស់ខ្លួន ដោយបានបង្ហាញអំពីគម្រោងមួយដែលស្ថានទូតនេះអះអាងថា វាជាផ្នែកមួយនៃគោលនយោបាយខ្សែក្រវ៉ាត់មួយ ផ្លូវមួយរបស់ចិននៅក្នុងប្រទេសអេក្វាឌ័រ។
ស្ថានទូតអាមេរិកសរសេរថា៖ «ពីរឆ្នាំក្រោយពីក្រុមហ៊ុនសំណង់រដ្ឋចិនបានសង់ទំនប់វារីអគ្គីសនីដ៏ធំមួយនៅប្រទេសអេក្វាឌ័រ (Ecuador) ទំនប់នេះដូចជាគ្មានដំណើរការសោះ។ សំណង់គ្មានគុណភាព និងការមិនគិតពីស្តង់ដាសុវត្ថិភាព មានន័យថា កសិករនៅផ្នែកខាងក្រោមត្រូវទទួលរងការជន់លិចជាញឹកញាប់»៕
