កម្មករ-កម្មការនី បានស្នើទៅប្រមុខរដ្ឋាភិបាលឲ្យជួយអន្តរាគមន៍ដោះស្រាយ ករណីម្ចាស់ផ្ទះជួលមួយកន្លែងតម្លើងថ្លៃបន្ទប់ ដោយថា វានឹងធ្វើឲ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគេ។
កាលពីល្ងាចម្សិលមិញនេះ កម្មករ-កម្មការនី និងអ្នកជួលផ្ទះផ្សេងទៀតរាប់រយនាក់ដែលបានជួលបន្ទប់ផ្ទះជួលមួយកន្លែងដែលគេហៅថា ផ្ទះ ឡ ស្ថិតក្នុងភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ បានផ្ទុះការតវ៉ាបិទច្រកចេញចូល បន្ទាប់ពីម្ចាស់ផ្ទះជួលតម្លើងថ្លៃបន្ទប់ជួលពី៥ដុល្លារ ទៅ២០ដុល្លារបន្ថែមទៀត ក្រោយត្រឡប់ពីចូលឆ្នាំ។
អ្នកស្រី ស៊ុំ សីលា ដែលបានជួលបន្ទប់ក្នុងផ្ទះឡ ប្រាប់ វី.អូ.ឌី នៅថ្ងៃនេះថា ម្ចាស់ផ្ទះជួលតម្លើងថ្លៃឈ្នួលបន្ទប់ចំនួន១០ដុល្លារបន្ថែមទៀត ខណៈបន្ទប់ជាប់ផ្លូវមានបើកអាជីវកម្មលក់ដូរផ្សេងៗតម្លើង២០ដុល្លារ។
ករម្មការិនីរូបនេះ មិនចង់ឲ្យមានការឡើងថ្លៃខ្ពស់ឡើយ ដោយថា នឹងធ្វើឲ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់។
អ្នកស្រីបន្ថែមថា៖ «ពីព្រោះខ្ញុំធ្វើការរោងចក្របានប្រាក់ខែបន្តិចបន្តួច ណាចំណាយហូបចុក បង់ថ្លៃបន្ទប់ផង សងបំណុលគេផង អត់មានសត្ថមភាពបង់ទេ។ ចុះបើកូនបន្ទប់ប៉ុណ្ណឹង ២៦ដុល្លារទៅហើយ ចុះបើឡើង៥ដុល្លារទៀត មិន៣០ដុល្លារទៅហើយ! ខ្ញុំគ្មានសមត្ថភាពបង់ទេ។»
អ្នកជួលបន្ទប់ម្នាក់ទៀត លោក ស សារ៉េត និយាយថា រាល់ថ្ងៃលោកជួលបន្ទប់ក្នុងផ្ទះឡនោះតម្លៃ៤៥ដុល្លារ ប៉ុន្តែ ក្រោយចូលឆ្នាំ ម្ចាស់ផ្ទះជួលបានតម្លើងថ្លៃ១០ដុល្លារបន្ថែមទៀត បានធ្វើឲ្យពួកគាត់ជាពលរដ្ឋក្រីក្រជួបផលលំបាកមួយកំរិតទៀត។
កម្មកររូបនេះបន្តថា អ្នកដែលមកជួលបន្ទប់នៅក្នុងផ្ទះឡនោះ ភាគច្រើនជាកម្មកររោងចក្រមកពីតាមបណ្តាខេត្តនានាដែលមករកការងារធ្វើនៅភ្នំពេញ។
លោក បន្ថែមថា៖ «អ៊ីចឹង ខ្ញុំសុំសំណូមពរទៅម្ចាស់ផ្ទះកុំឲ្យឡើងថ្លៃខ្ពស់ពេក ព្រោះបន្ទប់៤៥ដុល្លារហ្នឹង វាថ្លៃទៅហើយ ព្រោះបន្ទប់ហ្នឹងតូចមួយហ្នឹង ការ៉ូក៏គ្មាន យើងដាក់គ្រែហ្នឹង។ ហើយបានជានិយាយជាមួយសារព័ត៌មានហើយ ខ្ញុំសុំស្នើទៅដល់រដ្ឋាភិបាលជាពិសេសសម្តេច ហ៊ុន សែន សុំឲ្យគាត់ជួយសម្របសម្រួលថ្លៃផ្ទះជួល ឲ្យគាត់ជួយមើលប្រជាពលរដ្ឋនៅផ្ទះជួលផង ព្រោះឡើងថ្នាក់ៗហ្នឹង ប្រជាពលរដ្ឋបានអីរស់។ សុំឲ្យគាត់ ដើម្បីជួយពលរដ្ឋកាត់បន្ថយភាពក្រីក្រ ភាពអត់ឃ្លាន បើគាត់ឡើងអ៊ីចឹងទៀត វាប៉ះពាល់ដល់កម្មករខ្លាំងមែនទែន។»
វី.អូ.ឌី បានព្យាយាមរកការឆ្លើយតបពីភាគីម្ចាស់ផ្ទះជួលដែរ ប៉ុន្តែ មិនអាចរកការទំនាក់ទំនងបាន។
ចៅសង្កាត់ចោមចៅទី១ លោក កង វង មានប្រសាស៍ថា លោកជួបដោះស្រាយជាមួយម្ចាស់ផ្ទះជួលនៅល្ងាចនេះ ខណៈម្ចាស់ផ្ទះជួលសុំពន្យារពេលកាលពីព្រឹកមិញ។
លោកបន្ថែមថា៖ «កាលពីព្រឹកមិញ គាត់ឯកភាពតាមយើងហើយ ថាមិនឡើងថ្លៃខ្ពស់។ ប៉ុន្តែគាត់ទូរស័ព្ទមកមិញហ្នឹង គាត់ប្រែពាក្យសម្តីបន្តិច ចាំមើលល្ងាចហ្នឹងយើងជួបគាត់ម្តងទៀតដើម្បីបញ្ចប់រឿងហ្នឹង ហើយផ្សព្វផ្សាយឲ្យកម្មករជួលផ្ទះហ្នឹង បានល្ងាចម៉ោងជាង៥ល្ងាចហ្នឹងតែម្តង។»
ចៅសង្កាត់រូបនេះឲ្យដឹងថា ផ្ទះឡបន្ទប់ជួលជាង១ពាន់បន្ទប់ និងមានមនុស្សរស់នៅរាប់រយនាក់ដោយអ្នកខ្លះរស់នៅរួមជាមួយមិត្តភក្ដិខ្លះ និងជាលក្ខណៈគ្រួសារខ្លះផងដែរ។
ប្រធានសហភាពការងារកម្ពុជា លោក អត់ ធន់ មានប្រសាសន៍ថា ពេលដែលប្រាក់ឈ្នួលកម្មករឡើងអតិផរណា អ្វីផ្សេងៗទៀតក៏ឡើងថ្លៃដែរ ហើយថា ប្រសិនបើផ្ទះជួលឡើងថ្លៃថែមទៀតកម្មករនឹងជួបការលំបាកកាន់តែខ្លាំង។
មេដឹកនាំសហជីពរូបនេះ ស្នើទៅរដ្ឋាភិបាលឲ្យជួលសម្របសម្រួលករណីនេះ និងយកច្បាប់ជួលផ្ទះមកអនុវត្ត ដើម្បីដោះស្រាយបញ្ហាជូនកម្មករ។
លោក បន្ថែមថា៖ «ខ្ញុំគិតថា ច្បាប់ស្តីពីផ្ទះជួលហ្នឹងមានហើយ។ ហើយរដ្ឋាភិបាលក៏សន្យាថា ជួយសម្របសម្រួល ដើម្បីឲ្យម្ចាស់ផ្ទះហ្នឹងរក្សាតម្លៃនៅដដែល។ អញ្ចឹង នៅពេលដែលម្ចាស់ផ្ទះឡើងថ្លៃបែបហ្នឹង គឺរដ្ឋាភិបាលត្រូវសម្របសម្រួលជាមួយម្ចាស់ផ្ទះ ព្រោះយើងមើលប្រាក់ឈ្នួលកម្មករមិនទាន់ឡើង គាត់ពិបាក ហើយពេលប្រាក់ឈ្នួលឡើងហ្នឹង អ្វីផ្សេងៗ អតិផរណាក៏ឡើង គាត់ក៏ពិបាក។ អញ្ចឹង នៅពេលបន្ថែមទៅលើថ្លៃផ្ទះទៀត បានន័យថា ដូចគាត់អត់ឡើងប្រាក់ឈ្នួលផងហ្នឹង អញ្ចឹងគាត់កាន់តែពិបាក។»
ច្បាប់ភតិសន្យាពិសេស ឬហៅថាច្បាប់ជួលផ្ទះ នឹងមិនអនុញ្ញាតឲ្យម្ចាស់ផ្ទះជួលដំឡើងថ្លៃផ្ទះសម្រាប់កម្មករ និស្សិត និងសិស្ស ដែលជួលផ្ទះ ក្នុងអំឡុងពេលពីរឆ្នាំនៃការជួលផ្ទះ និងផ្តល់សិទ្ធិឲ្យអ្នកជួលផ្ទះអាចឈប់ជួលពេលណាក៏បាន។
មាត្រា១ នៃច្បាប់ផ្ទះជួល ចែងថា ច្បាប់នេះមានគោលបំណងធានាការពារសិទ្ធិ និងផលប្រយោជន៍របស់ភតិបតី (ម្ចាស់ផ្ទះជួល) និងភតិកៈ (អ្នកជួលផ្ទះ) ដើម្បីស្ថិរភាពក្នុងជីវភាពរស់នៅសណ្តាប់ធ្នាប់ និងរបៀបរៀបរយសាធារណៈ។ ច្បាប់ភតិសន្យាពិសេសនេះអនុវត្តចំពោះភតិកៈជាកម្មករ សិស្ស និងនិស្សិត ដែលជួលអចលនវត្ថុក្នុងគោលបំណងស្នាក់នៅតែប៉ុណ្ណោះ ហើយអចលនវត្ថុដែលជាកម្មសិទ្ធិនៃភតិសន្យា គឺជាបន្ទប់ជួលស្នាក់នៅ៕