នាយករដ្ឋមន្ត្រីកម្ពុជា លោក ហ៊ុន សែន បញ្ជាឲ្យកងកម្លាំងពង្រឹងសន្តិសុខ ដើម្បីទប់ស្កាត់កុំឲ្យកម្ពុជាក្លាយជាជំរកភេរវករ ខណៈមានការបំផ្ទុះគ្រាប់បែកនៅស្រីលង្កា ដែលបានសម្លាប់មនុស្សជាង៣០០នាក់ និងបង្កឲ្យរបួសជាង៥០០នាក់។
ក្នុងពិធីចែកសញ្ញាបត្រ ក្នុងរាជធានីភ្នំពេញ នាថ្ងៃនេះ លោក ហ៊ុន សែន បានថ្កោលទោសនូវទង្វើក្រុមអ្នកបំផ្ទុះគ្រាប់បែកនេះ។ លោកបញ្ជាទៅកងកម្លាំងគ្រប់ប្រភេទ ឲ្យពង្រឹងប្រសិទ្ធិភាពគ្រប់គ្រងការប្រើប្រាស់អាវុធជាតិផ្ទុះ ដោយថា ដើម្បីទប់ស្កាត់កុំឲ្យកម្ពុជាក្លាយជាជំរកពួកភេរវករ។
លោកថា៖ «ឃើញទឹកស្ងប់ មិនត្រូវគិតថា ក្នុងទឹកគ្មានត្រី ឬគ្មានសត្វដែលមានពិសនោះទេ។ ត្រូវប្រុងប្រយ័ត្នកុំឲ្យកម្ពុជាក្លាយទៅជាជម្រក ក្លាយជាគោលដៅនៃការវាយប្រហារភេរវកម្ម ឬក៏ជាជម្រកនៃអំពើភារវកម្ម។»
តាមការចុះផ្សាយរបស់សារព័ត៌មានរ៉យទ័រ ការវាយប្រហារបំផ្ទុះគ្រាប់បែកកាលពីថ្ងៃអាទិត្យនៅប្រទេសស្រីលង្កាក្នុងវិហារគ្រឹស្តសាសនាចំនួន ៣ និងសណ្ឋាគារចំនួន៤ បានសម្លាប់មនុស្ស ៣២១ នាក់។ អាជ្ញាធរស្រីលង្កា អះអាងថា ជនសង្ស័យ៤០នាក់ ត្រូវបានចាប់ខ្លួនក្នុងករណីបំផ្ទុះគ្រាប់បែកនេះ ហើយកំពុងស៊ើបអង្កេតអ្នកនៅពីក្រោយការវាយប្រហារដ៏ឃោរឃៅនេះ៕
