មន្ត្រីជាន់ខ្ពស់រដ្ឋាភិបាលលើកឡើងថា ក្នុងឆ្នាំ២០១៨ ការបង្ក្រាបបទល្មើសជួញដូរមនុស្សមានការថយចុះជាង២០ករណី ខណៈជនសង្ស័យនៃបទល្មើសមានការកើនឡើង។
ក្នុងកិច្ចប្រជុំផ្សព្វផ្សាយរបាយការណ៍ជាតិស្ដីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០១៨ អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង មានប្រសាសន៍ថា ក្នុងការបង្ក្រាបការជួញដូរមនុស្សក្នុងឆ្នាំ២០១៨កន្លងទៅ សមត្ថកិច្ចបង្ក្រាបបទល្មើសជួញដូរមនុស្ស និងអាជីវកម្មផ្លូវភេទបាន ១៣៤ករណី ថយចុះ ២៥ករណី តែចំនួនជនសង្ស័យមានការកើនឡើងពី ២០៣នាក់ នៅឆ្នាំ២០១៧ មក ២២៤នាក់ នៅឆ្នាំ២០១៨។
លោកស្រីក៏បានឲ្យដឹងបន្ថែមផងដែរថា ជនរងគ្រោះនៃអំពើជួញដូរមនុស្សមានចំនួន ២៣០នាក់ ថយចុះ ១១៥នាក់ពីឆ្នាំ២០១៧ ក្នុងនោះជនរងគ្រោះមានអាយុក្រោមអាយុ១៥ឆ្នាំ មាន ៩២នាក់ ពី១៥ ដល់១៨ឆ្នាំ មាន ២៣នាក់ និងលើ១៨ឆ្នាំ មាន ១១៥នាក់។
លោកស្រី ជូ ប៊ុនអេង ក៏បានឲ្យដឹងផងដែរថា ក្នុងឆ្នាំ២០១៨ បទល្មើសពរពោះជំនួសមាន ២ករណី ឃាត់បានជនសង្ស័យ ៨នាក់ ក្នុងនោះមានជនបរទេស ១នាក់ និងស្ត្រីពរពោះជំនួសចំនួន ៤៥នាក់។
បើតាមលោកស្រី ជូ ប៊ុនអេង រហូតមកដល់ពេលនេះជនរងគ្រោះពីអំពើជួញដូរមនុស្សចំនួន ៨៤៨នាក់ ស្ត្រី ៦៤៣នាក់ និងកុមារ ១៦៩នាក់ កំពុងទទួលសេវាស្នាក់នៅ និងនីតិសម្បទាពីរដ្ឋ ខណៈមនុស្សចំនួន ៣០៣នាក់ ដែលមានស្ត្រី ២០៦នាក់ និងកុមារា ៦៣នាក់ ត្រូវបានបញ្ជូនឲ្យត្រលប់ទៅកាន់សហគមន៍រស់នៅរបស់ពួកគេវិញផងដែរ៕