តុលាការខេត្តព្រះសីហនុបានសម្រេចចោទប្រកាន់ និងឃុំខ្លួនអ្នកតវ៉ាបិទផ្លូវ និងប្រើប្រាស់ហិង្សាចំនួន៨នាក់ បន្ទាប់ពីពួកគេបានតវ៉ាបិទផ្លូវសាធារណៈ និងឈានដល់ការគប់ដុំថ្មប្រឆាំងសមត្ថកិច្ចកាលពីចុងសប្ដាហ៍មុន។
អ្នកនាំពាក្យសាលាដំបូងខេត្តព្រះសីហនុ លោក លឹម ប៊ុនហេង បានឲ្យ VOD ដឹងថា អ្នកតវ៉ាចំនួន៨នាក់ ក្នុងនោះមានស្រ្តីពីរនាក់ដែលបានបិទផ្លូវ និងប្រើប្រាស់ហិង្សាមកលើសមត្ថកិច្ច ត្រូវបានតុលាការខេត្តសម្រេចចោទប្រកាន់កាលពីថ្ងៃទី២១ ខែមេសា ពីបទរារាំងដើម្បីធ្វើជាឧបសគ្គដល់ការធ្វើចរាចរណ៍ផ្លូវគោកតាមមាត្រា៨០ នៃច្បាប់ចរាចរណ៍ផ្លូវគោក និងបទហិង្សាដោយចេតនាមានស្ថានទម្ងន់ទោសតាមមាត្រា២១៨ និង៤១១ នៃក្រមព្រហ្មទណ្ឌ។
លោកថា៖ «ករណីហ្នឹងដល់ទីបី(ករណី) ព្រោះដល់ទៅពីរថ្ងៃ ហើយម៉ោងខុសគ្នា កាលៈទេសៈខុសគ្នា ព្រឹត្តិការណ៍កើតពីរថ្ងៃ តែជារួមទៅយើងអាចសរុបបានថា បទល្មើសនោះគឺប្រហាក់ប្រហែលគ្នា។»
កូនស្រីរបស់ជនត្រូវចោទឈ្មោះ ធី សាលិ អ្នកស្រី សៅ ឡាលីន មានប្រសាសន៍ថា ការចោទប្រកាន់មកលើម្ដាយរបស់អ្នកស្រី គឺមិនអាចទទួលយកបាននោះទេ ដោយថា ម្ដាយរបស់ខ្លួនមិនមានពាក់ព័ន្ធនឹងដីនោះទេ ហើយថ្ងៃកើតហេតុនោះ ម្ដាយអ្នកស្រីគ្រាន់តែទៅមើលចៅរបស់ខ្លួនប៉ុណ្ណោះ និងមិនបានចូលរួមតវ៉ានោះទេ។
អ្នកស្រីសៅ ឡាលីន៖ «បើគាត់អត់មានដីក្នុងហ្នឹងផង អ្នកផ្សេងបាតុកម្ម ខ្ញុំមិនថាទេ! តែម្ដាយខ្ញុំ គាត់អត់មានជាប់ពាក់ព័ន្ធអីក្នុងហ្នឹងទេ។»
គ្រួសាររបស់ជនត្រូវចោទម្នាក់ទៀតឈ្មោះ នាម ជីម គឺអ្នកស្រី សាន សុខា បានបដិសេធចំពោះការចោទប្រកាន់របស់តុលាការលើប្ដីអ្នកស្រី ដោយថា នាថ្ងៃកើតហេតុនោះ ប្ដីអ្នកស្រីមិនបានបិទផ្លូវ និងគប់ទៅលើសមត្ថកិច្ចនោះទេ។
អ្នកស្រី សាន សុខា៖ «គេ (អ្នកតវ៉ា) ឲ្យស្រីៗបំបុកចូលទៅ ហើយសមត្ថកិច្ចក៏បានវាយស្រីៗ ហើយប្ដីខ្ញុំក៏ហក់ទៅរង ព្រោះអីសមត្ថកិច្ចវ៉ៃ ខ្ញុំអត់ដឹង។ ដល់ហើយខ្ញុំចេះតែឆ្ងល់សមត្ថកិច្ចវាយម៉េចចបានខ្ញុំមិនត្រូវ? ហើយប្ដីខ្ញុំគាត់ថា បើគាត់យកដៃរងក្បាលខ្ញុំហើយហ្នឹង! ហើយខ្ញុំនៅពីមុខគេហ្នឹង គេចេះតែបំបុកទៅព្រោះគេរុញ។ ដល់ពេលហើយ អញ្ចឹងប្ដីខ្ញុំខឹងសមត្ថកិច្ចដែលវាយខ្ញុំអញ្ចឹងទៅ។ ប្រុសៗ គេកញ្ជ្រោលទៅគប់ហ្នឹង តែប្ដីខ្ញុំគាត់គ្រាន់តែរើសដុំថ្ម ដើរឡើងមិនបានគប់ទេ!។»
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុអ្នកស្រី ជៀប សុធារី មានប្រសាសន៍ថា សមាគមមិនគ្រាំទ្រការតវ៉ាបិទផ្លូវ និងប្រើប្រាស់ហិង្សានេះទេ តែអ្នកស្រីជំរុញដល់តុលាការឲ្យធ្វើការស៊ើបអង្កេតឲ្យបានលំអិតបន្ថែមទៀត ដោយថា ពលរដ្ឋដែលត្រូវបានសមត្ថកិច្ចចាប់ខ្លួនមួយចំនួននោះមិនមែនជាអ្នកប្រព្រឹត្តិដូចការចោទប្រកាន់នោះទេ។
អ្នកស្រីជៀប សុធារី៖ «អ្នកដែលធ្វើសកម្មភាពខ្លាំងក្នុងការតវ៉ា និងរារាំងហ្នឹង មានអ្នកខ្លះរត់បាត់អស់ហើយ! ហើយចំពោះអ្នកដែលប៉ូលិសចាប់ខ្លួនគាត់បាន ដោយសារតែគាត់គិតថាគាត់អត់បានធ្វើអីខុស អញ្ចឹងគាត់អត់បានរត់ទៅណាទេ។ […] នៅពេលដែលគេ (ប៉ូលិស) ចាប់ខ្លួនពួកគាត់ហ្នឹង ខាងព្រះរាជអាជ្ញារង ហួត វិចិត្រ ហ្នឹងបានហៅប្រជាពលរដ្ឋទៅនិយាយជាមួយគ្នាសិន អញ្ចឹងប្រជាពលរដ្ឋក៏ទៅជាមួយអញ្ចឹងទៅ។ ទៅអង្គុយក្នុងរោងក្បែរហ្នឹងទៅដើម្បីជជែកគ្នាអញ្ចឹងទៅ ពួកគាត់ក៏ត្រូវបានគេនាំខ្លួនទៅដោយចោទថា ពួកគាត់ហ្នឹងបានប្រើដុំថ្ម បានចូលរួមក្នុងការបិទផ្លូវបិទអីហ្នឹង។»
កាលពីថ្ងៃសុក្រសប្ដាហ៍មុន ពលរដ្ឋជាង១០០នាក់ បានបិទផ្លូវតវ៉ាទៅនឹងការចុះអនុវត្តសាលក្រមតុលាការដែលសម្រេចរុះរើសំណង់អនាធិបតេយ្យរបស់ពួកគេចេញពីដីឯកជនមួយកន្លែងក្នុងភូមិចំណោតរាម ឃុំបិតត្រាំង (អូរត្រាវ) ស្រុកព្រៃនប់ ខេត្តព្រះសីហនុ ដែលនៅពេលនោះបានឈានដល់ការគប់ដុំថ្មប្រឆាំងអាជ្ញាធរ និងបានធ្វើឲ្យសមត្ថកិច្ច៦នាក់រងរបួសធ្ងន់ស្រាល និងខូចខាតរថយន្ត៣គ្រឿង៕
