កម្មវិធីអភិវឌ្ឍន៍របស់អង្គការសហប្រជាជាតិ (UNDP) បង្ហាញរបាយការណ៍ដោយបញ្ជាក់ថា បើមិនមានវិធានការណាមួយទប់ស្កាត់នោះទេ សីតុណ្ហភាពនឹងបន្តឡើង៣អង្សាបន្ថែមទៀត គិតត្រឹមឆ្នាំ២០៥០។
ទំព័រហ្វេសប៊ុករបស់ UNDP ប្រចាំកម្ពុជាបានលើកឡើងថា បើមិនមានការទប់ស្កាត់ទេ នៅឆ្នាំ២០៣០ សីតុណ្ហភាពពិភពលោកកើនឡើង១,៥អង្សា ហើយនៅឆ្នាំ២០៥០ កើនឡើងថែម៣អង្សា។
ទីប្រឹក្សាគម្រោងថ្នាក់ជាតិរបស់ UNDP លោក សួស ពិនរក្ស ថ្លែងក្នុងកម្មវិធី 8 Minute Talk របស់ វី.អូ.ឌី ថា បញ្ហាឡើងកម្តៅ គឺជាបញ្ហាសកលលោក។ ប៉ុន្តែ លោកថា តំបន់ដែលមានព្រៃឈើច្រើនការពារនឹងអាចជួយកាត់បន្ថយគ្រោះថ្នាក់ដែលបង្កឡើងពីកម្តៅ។
កាលពីថ្ងៃទី២២ ខែមេសា កន្លងទៅ ក្រសួងធនធានទឹក និងឧតុនិយមរបស់កម្ពុជាបានណែនាំឱ្យប្រជាពលរដ្ឋមានការប្រុងប្រយ័ត្នដោយសារកម្តៅបន្តឡើងពី៤០ ទៅ៤១អង្សា។