លោក ឌូតឺតេ (Duterte) នៅថ្ងៃអង្គារម្សិលមិញ បានព្រមានធ្ងន់ៗទៅកាណាដា ដោយទុកពេលមួយសប្តាហ៍ឲ្យប្រទេសនេះ យកសំរាមដែលដឹកចូលហ្វីលីពីនដោយខុសច្បាប់ចេញឲ្យអស់។
ការព្រមានធ្ងន់ៗរបស់ប្រធានាធិបតីហ្វីលីពីនរូបនេះ ធ្វើឡើងក្រោយពីកាណាដាបរាជ័យក្នុងការដឹកត្រលប់ទៅវិញនូវសំរាម២៥០០តោនរបស់ខ្លួន ដែលត្រូវបានលួចបន្លំដឹកចូលមកចោលនៅហ្វីលីពីនដោយខុសច្បាប់។
លោក ឌូតឺតេ លើកឡើងថា ប្រទេសកាណាដាកំពុងចាត់ទុកហ្វីលីពីនជាប្រទេសសម្រាប់ចាក់សំរាមរបស់ខ្លួន។ លោកថា បើកាណាដា មិនព្រមដឹកសំរាមទាំងនោះត្រលប់ទៅវិញទេ ហ្វីលីពីន នឹងធ្វើការឆ្លើយតបទៅវិញឲ្យបានចាស់ដៃ។
លោក បន្តថា វិធានការណ៍របស់ហ្វីលីពីន គឺរៀបចំកប៉ាល់ដឹកសំរាមទាំងនោះទៅចាក់ចោលនៅកាណាដាវិញ។ តាមរយៈវីដេអូឃ្លីបដែលបង្ហោះលើគេហទំព័ររបស់បណ្ដាញទូរទស្សន៍សាធារណៈអូស្ត្រាលី SBS លោក ឌូតឺតេ បានថ្លែងបែបចំអកទៅកាណាដាឲ្យរៀបចំទទួលសំរាមទាំងនោះឲ្យបានគគ្រឹកគគ្រេងផង។ មិនត្រឹមតែប៉ុណ្ណោះ ប្រធានាធិបតីហ្វីលីពីនរូបនេះ ក៏បានប្រាប់ទៅកាណាដាផងដែរថា ឲ្យញ៉ាំសំរាមទាំងអស់នោះទៅបើចង់។
សំរាមទាំងអស់នោះ ត្រូវបានដឹកចេញពីប្រទេសកាណាដាទៅចោលនៅប្រទេសហ្វីលីពីនដោយក្រុមហ៊ុនមួយនៅចន្លោះពីឆ្នាំ២០១៣ និង២០១៤។ ក្រុមហ៊ុនដែលដឹកសំរាមទាំងនោះ បានបន្លំថា វាជាប្រភេទសំណល់សម្ភារប្លាស្ទិកចាស់ៗ។ ប៉ុន្តែ តាមពិតទៅនៅក្នុងកុងតឺន័រទាំង១០៣ ដែលដឹកចូលមកនោះគឺជាសំរាមផ្ទះបាយ និងខោទឹកនោមមនុស្សចាស់ដែលប្រើហើយ ជាដើម។
តាមការចុះផ្សាយរបស់សារព័ត៌មាន Telesur ក្នុងចំណោមសំរាមទាំង១០៣កុងតឺន័រ មានតែសំរាម២៦កុងតឺន័រប៉ុណ្ណោះ ដែលត្រូវបានកប់ចោលក្នុងវាលចាក់សំរាមរបស់ហ្វីលីពីន ក្រៅពីនេះរក្សាទុកដដែល។ រដ្ឋាភិបាលកាណាដាក្នុងរយៈពេលពាក់កណ្ដាលទសវត្សមកនេះ បានព្យាយាមម្តងហើយម្តងទៀតឲ្យហ្វីលីពីនព្រមទទួលយកសំរាមទាំងនោះ។ ទោះបីជាមានការបញ្ចុះបញ្ចូលយ៉ាងណាក៏ដោយ ក៏នៅឆ្នាំ២០១៦ តុលាការហ្វីលីពីនបានសម្រេចឲ្យដឹកសំរាមទាំងនោះទៅកាណាដាវិញ។
ក្នុងដំណើរទស្សនកិច្ចក្នុងប្រទេសហ្វីលីពីនកាលពីឆ្នាំ២០១៧កន្លងទៅ នាយករដ្ឋមន្រ្តីកាណាដា លោក Justin Trudeau អះអាងថា ប្រទេសលោកនឹងស្វែងរកដំណោះស្រាយរួមមួយជុំវិញបញ្ហានេះ។ ប៉ុន្តែ រហូតមកដល់ពេលនេះ សំរាមទាំងនោះនៅតែទុកចោលក្នុងកុងតឺន័រក្នុងប្រទេសហ្វីលីពីនដដែល ដោយមិនមានក្រុមហ៊ុន ឬភាគីកាណាដាចេញមុខដឹកទៅវិញនោះទេ៕
