កងរាជអាវុធហត្ថលើផ្ទៃប្រទេស បញ្ជូនមន្ត្រីយោធាផ្កាយ១ម្នាក់ និងភរិយា ទៅតុលាការយោធា ដោយសង្ស័យថា មន្ត្រីទាំងនោះជាប់ពាក់ព័ន្ធទៅនឹងអំពើឆបោក ទទួលយកប្រាក់ ដើម្បីរត់ការផ្តល់តំណែងក្នុងស្ថាប័នរដ្ឋ។
កាលពីថ្ងៃអង្គារម្សិលមិញ កងរាជអាវុធហត្ថលើផ្ទៃប្រទេស បានឃាត់ខ្លួនមន្ត្រីយោធាផ្កាយ១ម្នាក់ គឺលោក ឃួន សុវណ្ណ ជានាយរងអធិការដ្ឋាននៃអគ្គបញ្ជាការ និងភរិយា ជាមន្ត្រីក្រសួងការពារជាតិ តាមបណ្តឹងរបស់ប្រជាពលរដ្ឋនៅខេត្តកំពង់ធំ ។
មន្ត្រីនោះ រងការចោទថា បានសន្យាផ្តល់តំណែងជានគរបាល ទាហាន និងគ្រូបង្រៀន ជាដើម ជាថ្នូរនឹងការបង់លុយមុន។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ឲ្យ VOD ដឹងនៅថ្ងៃពុធនេះ ថា ការឃាត់ខ្លួនមន្ត្រីយោធាផ្កាយ១ និងភរិយានេះ ក្រោយមន្ត្រីជំនាញ សាកសួរពលរដ្ឋជាដើមបណ្តឹងរួចមក។
ប៉ុន្តែ អ្នកនាំពាក្យរូបនេះ សុំមិនធ្វើអត្ថាធិប្បាយលម្អិត ថាតើមានពលរដ្ឋប៉ុន្មាននាក់បានប្តឹង និងទឹកប្រាក់ប៉ុន្មានសម្រាប់ជាថ្នូររត់ការផ្តល់តំណែងនេះទេ ដោយបង្វែរឲ្យសួរទៅតំណាងអយ្យការ តែ VOD មិនអាចទាក់ទងតំណាងអយ្យការយោធាបាន។
លោកថា៖ «ករណីហ្នឹង យើងបានឃាត់ខ្លួនមនុស្សពីរនាក់ហើយ ទាំងឯកសារទាំងមនុស្សយើងបានបញ្ចូលទៅដល់អយ្យការហើយ ដូច្នេះ បើចង់សួរព័ត៌មានច្បាស់ សួរខាងអយ្យការ អញ្ចឹងខាងអាវុធហត្ថបានកសាងនីតិវិធីបានត្រឹមប៉ុណ្ណឹង»។
ប៉ុន្តែ បើតាមគេហទំព័រ Fresh News ដែលស្និទ្ធនឹងរដ្ឋាភិបាល បានចុះផ្សាយថា ពលរដ្ឋជាច្រើនបានចាញ់បោកមន្ត្រីយោធាផ្កាយ១ និងភរិយា ដែលបានចាប់ឃាត់ខ្លួននេះ ដោយថា៖
«ខ្លះចាញ់បោកចាប់ពី១៥០០ដុល្លារ រហូតដល់ជាង៦០០០ដុល្លារ [….]។ បើទោះបីទំហំទឹកប្រាក់មិនទាន់អាចបញ្ជាក់ពិតប្រាកដ ប៉ុន្ដែ ចន្លោះពី១០ ទៅ២០ម៉ឺនដុល្លារ ដែលពួកគេបានបោកប្រាស់ពីប្រជាពលរដ្ឋ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ហៅករណីនេះថា ជាអំពើពុករលួយ និងចាត់ទុកថា ចំណាត់ការនេះជាសញ្ញាវិជ្ជមានឆ្ពោះទៅគាស់ឫសគល់នៃអំពើពុករលួយជាប្រព័ន្ធនៅរដ្ឋបាលសាធារណៈ បើវិធានការធ្វើឡើងសកម្មមិនប្រកាន់បក្ខពួក។
លោកថា៖ «ការរត់ការដើម្បីបានតំណែង ឬក៏ឡើងបុណ្យស័ក្តិនេះ ខ្ញុំគិតថា ជាអ្វីដែលត្រូវធ្វើឲ្យបានច្រើន ដើម្បីកុំឲ្យកើតនូវជំងឺសូកប៉ាន់តំណែងហ្នឹងតទៅទៀត»។
លោក សន ជ័យ អះអាងទៀតថា ករណីទទួលសំណូកនេះ ច្បាប់ចែងដាក់ទោសជាប់ពន្ធនាគារពី២ ទៅ៥ឆ្នាំ។
អង្គការតម្លាភាពអន្តរជាតិ កាលពីឆ្នាំ២០១៨ បានចេញផ្សាយរបាយការណ៍វាយតម្លៃមួយថា អំពើពុករលួយនៅកម្ពុជានៅតែស្ថិតក្នុងកម្រិតធ្ងន់ធ្ងរជាងប្រទេសជាសមាជិកអាស៊ាន។
នោះក៏ដោយសារការធ្វើកំណែទម្រង់ជាច្រើនរបស់រដ្ឋាភិបាលពាក់ព័ន្ធនឹងការប្រឆាំងអំពើពុករលួយដែលត្រូវបានលើកឡើងដោយអ្នកជំនាញផ្នែកអភិបាលកិច្ច អ្នកជំនាញប្រយុទ្ធប្រឆាំងអំពើពុករលួយ មិនត្រូវបានយកទៅអនុវត្តប្រកបដោយប្រសិទ្ធភាព។
ទោះជាយ៉ាងណា រដ្ឋាភិបាលនៅអាណត្តិទី៦នេះ បានប្តេជ្ញាថា ខ្លួននឹងបន្តធ្វើកំណែទម្រង់ដ៏ស៊ីជម្រៅតាមអភិក្រមទាំង៥ មាន ងូតទឹក ឆ្លុះកញ្ចក់ ដុះក្អែល ព្យាបាល និងវះកាត់ ដើម្បីប្រយុទ្ធប្រឆាំងនឹងអំពើពុករលួយ។
