រដ្ឋមន្ត្រីក្រសួងការពារជាតិ លោក ទៀ បាញ់ អំពាវនាវឲ្យពលរដ្ឋចូលរួមទប់ស្កាត់ការលាភពណ៌ ដោយថា បញ្ហានេះវានឹងជំរុញកម្ពុជាឲ្យធ្លាក់ចូលទៅក្នុងវិបត្តិសង្គ្រាមស៊ីវិលដូចពីអតីតកាលដែលនឹកស្មានមិនដល់។
លោក ទៀ ចាញ់ សរសេរលើហ្វេសប៊ុករបស់លោកនាថ្ងៃពុធម្សិលមិញនថា៖ «ការលាបពណ៌ ជាមូលហេតុចម្បងដែលធ្វើឱ្យប្រជាជាតិយើងស្អប់គ្នា យកគ្នាជាសត្រូវ និងសងសឹកគ្នា រហូតឈានដល់ការកកើតសង្គ្រាម ដែលមិននឹកស្មានដល់។ ខ្ញុំសង្ឃឹមថា ប្រជាពលរដ្ឋកម្ពុជាគ្រប់រូបនឹងស្វែងយល់អំពីរូបភាព និងផលវិបាកនៃការលាបពណ៌ និងរួមគ្នាទប់ស្កាត់ឱ្យខានតែបាននូវរាល់សកម្មភាពលាបពណ៌នៅក្នុងសង្គមកម្ពុជា»។
លោក ទៀ បាញ់ ឲ្យ VOD ដឹងបន្ថែមថា តាមបទពិសោធន៍កន្លងទៅ សង្គ្រាមស៊ីវិលដែលបានកើតឡើងនៅកម្ពុជា លោកថា ដោយសារតែការលាភពណ៌គ្នានេះ ។
លោក ទៀ បាញ់ អះអាងថា បច្ចុប្បន្នការលាភពណ៌រដ្ឋាភិបាល ថាជាអាយ៉ងយួន អាយ៉ងចិនជាដើម លោកថា ជាដើមចមជំរុញឲ្យមានចរន្តបែកបាក់ជាតិ និងត្រូវទប់ស្កាត់។
លោកថា៖ «ការចោទប្រកាន់មកលើរដ្ឋាភិបាលក្តី ចោទប្រកាន់មកលើគណបក្សប្រជាជនក្តី ឬក៏ចោទប្រកាន់ទៅលើអ្នកមួយចំនួនថា មិនគោរពប្រជាធិបតេយ្យ ចោទប្រកាន់ថាផ្តាច់ការ ចោទសព្វបែបយ៉ាងទាំងអស់ អាហ្នឹងហើយដែលខ្ញុំចាត់ទុកថា ជាមូលដ្ឋានដែលសំខាន់ ដើម្បីបង្កឲ្យជាតិបែកបាក់ ត្រូវទប់ស្កាត់របៀបហ្នឹង»។
ទោះជាយ៉ាងណា នៅពេលសួរថា តើលោកសង្កេតឃើញបក្សកាន់អំណាចធ្លាប់បានលាភពណ៌ដល់គណបក្សនយោបាយដទៃទៀត ដើម្បីជាផលប្រយោជន៍នយោបាយដែរឬទេ? រដ្ឋមន្រ្តីក្រសួងការពារជាតិរូបនេះ អះអាងថា គណបក្សប្រជាជនកម្ពុជាមិនមានទម្លាប់បែបនេះទេ។
អតីតអនុប្រធានគណបក្សសង្គ្រោះជាតិ លោក ស្រី មូរ សុខហួរ កំពុងនិរទេសខ្លួន អះអាងថា គណបក្សនេះ ប្រកាន់យកគោលការណ៍មិនយកខ្មែរធ្វើជាសត្រូវ ហើយថា អ្នកដែលចិញ្ចឹមចិត្តផាត់គណបក្សលោកស្រីដែលមានអ្នកគាំទ្រជិតពាក់បណ្តាលប្រទេសចេញពីឆាកនយោបាយ ថាអ្នកនោះជាអ្នកបង្កបង្កើតឲ្យមានចរន្តបែកបាក់ជាតិ ។
លោកស្រី ថា៖ «យើងសុំឲ្យបញ្ចប់ទៅ ដែលថា អ្នកនេះ [បក្សប្រឆាំង] ជាក្រុមឧទ្ទាម បញ្ជាឲ្យកម្ចាត់ពួកឧទ្ទាម។ រឿងនេះ វាធ្ងន់ធ្ងរជាងលាភពណ៌ទៅទៀត។ អញ្ចឹង [បើបញ្ចប់បញ្ហានេះ] យើងចូលទៅប្រទេសជាតិយើងវិញ ដើម្បីដោះស្រាយបញ្ហាជាតិ។ ការលាភពណ៌ជារឿងម្យាងទេ ប៉ុន្តែ ការបញ្ជាឲ្យកម្ចាត់នោះ អាហ្នឹងជារឿងធំជាងលាភពណ៌ទៅទៀត»។
អ្នកវិភាគនយោបាយវ័យក្មេង កញ្ញា លី ស្រីស្រស់ កត់សម្គាល់ថា អ្នកនយោបាយពេលនេះ បានចោទគ្នាទៅវិញទៅមកថា ក្បត់ជាតិ។ កញ្ញា ហៅសាររបស់លោក ទៀ បាញ់ នេះថា ជាអាវុធញមុខពីរ ។
អ្នកវិភាគវ័យក្មេងរូបនេះ វិភាគថា បើលោក ទៀ បាញ់ មានជំហរឯករាជ្យ សារនេះជំរុញឲ្យមានការបង្រួបបង្រួមជាតិឡើងវិញ។ តែថា បើលំអៀង សារនេះនឹងក្លាយជាឧបករណ៍បំបែកបំបាក់ជាតិកាន់តែខ្លាំង ព្រោះវាបានធ្វើឲ្យមនុស្សមួយក្រុមចេះតែបន្តរងគ្រោះរហូត តែមួយក្រុមទៀតត្រូវគេមើលរំលង។
កញ្ញាថា៖ «បើសិនជាលោក ទៀ បាញ់ ក៏ដូចជា ជំហររដ្ឋាភិបាលនៅតែគិតថា គណបក្សប្រឆាំង សង្គមស៊ីវិល ជាអ្នកលាភពណ៌មកលើរដ្ឋាភិបាល ហើយមិនគិតពីបុគ្គលិកលក្ខណៈ ឬក៏ចរិតខ្លួនឯងលាភពណ៌ដែរទេ! ខ្ញុំគិតថា ប្រជាពលរដ្ឋ ក៏ដូចជា គណបក្សប្រឆាំង ឬក៏អ្នកធ្វើការនៅអង្គការសង្គមស៊ីវិលទាំងអស់ហ្នឹងហើយ ជាជនរងគ្រោះអំពីការលាភពណ៌នៅកម្ពុជា»។
កាលពីខែកុម្ភៈ ឆ្នាំ២០១៨ រដ្ឋាភិបាលបានចេញផ្សាយសៀវភៅ «ស» ដែលអះអាងថា កម្ពុជាកំពុងកើតមាននូវបដិវត្ដន៍ពណ៌មួយ រៀបចំឡើងដោយអតីតគណបក្សប្រឆាំង នូវអ្វីដែលរដ្ឋាភិបាលថា ដើម្បីផ្ដួលរំលំរដ្ឋាភិបាលស្របច្បាប់។ ក្នុងសៀវភៅនោះ រដ្ឋាភិបាលក៏បានចោទប្រកាន់អង្គការជាង ៣០០ ថា បានចូលរួមក្នុងបដិវត្តន៍។
ចាប់ពីពេលនោះមក សហគមន៍អន្តរជាតិនៃប្រទេសលោកសេរី ដែលនាំមុខគេដោយសហរដ្ឋអាមេរិក និងសហភាពអឺរ៉ុប ហៅការចោទប្រកាន់នោះថា បានធ្វើឲ្យលំហប្រជាធិបតេយ្យរួមតូច និងជំរុញរដ្ឋាភិបាលឲ្យស្តារស្ថានការណ៍ឡើងវិញ ឈានទៅបង្រួបបង្រួមជាតិ ៕