ក្រុមសហជីពប្ដេជ្ញាថា នឹងរៀបចំប្រារព្វពិធីរំឭកទិវាពលកម្មអន្តរជាតិថ្ងៃទី១ ខែឧសភា ខាងមុខនេះ ទៅតាមគ្រោងទុកដោយមានអ្នកចូលរួមរាប់ពាន់នាក់ ទោះបីជាអាជ្ញាធរមិនអនុញ្ញាតក៏ដោយ។
កាលពីថ្ងៃទី៨ ខែមេសា តំណាងសហព័ន្ធសហជីព និងសមាគម បានដាក់លិខិតទៅសាលារាជធានីភ្នំពេញ ដើម្បីស្នើសុំរៀបចំប្រារព្វពិធីរំឭកទិវាពលកម្មអន្តរជាតិ ខួបលើកទី១៣៣ នៅថ្ងៃទីទី១ ឧសភា ខាងមុខនេះ ដែលមានអ្នកចូលរួមរាប់ពាន់នាក់។
តាមគម្រោងសហជីព និងសមាគម នឹងជួបជុំនៅទីតាំងបីផ្សេងគ្នាគឺនៅទីលានប្រជាធិបតេយ្យ សួនច្បារក្បែរវត្តភ្នំ និង សួនច្បារមុខវត្តបុទុមវតី។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា សាលារាជធានីភ្នំពេញមិនអនុញ្ញាតឱ្យពួកគាត់ហែក្បួននិងជួបជុំគ្នាច្រើននោះទេ ដោយលើកហេតុផលថា ធ្វើឱ្យប៉ះពាល់សណ្ដាប់ធ្នាប់សាធារណៈ។
លោកអាត់ ធន់ បញ្ជាក់ថា នៅថ្ងៃទិវាពលកម្មអន្តរជាតិខាងមុខនេះ ពួកគាត់នៅតែរក្សាជំហរធ្វើការហែក្បួនពីសួនច្បារមុខក្រុមប្រឹក្សាសម្រាប់ការអភិវឌ្ឍន៍កម្ពុជា ក្បែរវត្តភ្នំ ទៅកាន់មុខរដ្ឋសភា ដើម្បីដាក់ញត្តិដដែល ទោះបីជាអាជ្ញាធរមិនអនុញ្ញាតក៏ដោយ។
លោកថា៖«យើងនៅតែបន្តធ្វើ កម្មវិធីរបស់យើង បន្ទាប់មកយើងនឹងពិនិត្យតាមជាក់ស្ដែង តាមលទ្ធភាពយើងដែលយើងអាចហែបានត្រឹមណា យើងហែត្រឹមហ្នឹង។ បារម្ភយើងពិតជាបារម្ភហើយ ព្រោះធម្មតាមិនដែលមានការអនុញ្ញាតណាមួយ ដែលយើងអាចធ្វើបានស្រួល ព្រោះយើងមានបទពិសោធន៍ ៤ ទៅ ៥ ឆ្នាំហើយ មិនចេះស្រួលទេ គ្រាន់តែថា យើងចង់ផ្ញើសារថា ថ្ងៃហ្នឹង ជាថ្ងៃទិវាទពលកម្មអន្តរជាត។ អ៊ីចឹងគួរតែរដ្ឋាភិបាល ដល់ពេលវេលា ផ្ដល់ឱកាសឱ្យយើងសម្ដែងសារ សម្ដែងមតិធ្វើយើងមិនអាចធ្វើកូដកម្ម បាតុកម្មបានដូចលើកមុនទៀត ព្រោះសូម្បីថ្ងៃហ្នឹងយើងធ្វើមិនបានទៀតអាហ្នឹងធ្វើម៉េច»។
ប្រធានសភាពសហជីពកម្ពុជា លោក រ៉ុង ឈុន មានប្រសាសន៍ថា សាលារាជធានីបានយល់ព្រមឱ្យពួកគាត់បា្ររព្ធពិធីនៅទីលានប្រជាធិបតេយ្យ ប៉ុន្តែសាលារាជធានីមិនអនុញ្ញាតឱ្យពួកគាត់ជួបជុំគ្នាចំនួន៤៥០ នាក់ ទៅតាមការស្នើសុំនោះទេ។
លោកបន្តថា សាលារាជធានីភ្នំពេញបានកំណត់ឱ្យមានអ្នកចូលរួមក្នុងថ្ងៃបា្ររព្ធត្រឹមតែ ២០០ នាក់ ប៉ុណ្ណោះ ប៉ុន្តែលោកចង់បានអ្នកចូលរួមច្រើនជាងនេះ ទើបសាលារាជធានីក៏បញ្ជូនសំណើពួកគាត់ទៅក្រសួងមហាផ្ទៃ។ រហូតមកដល់ថ្ងៃនេះ លោកថា ក្រសួងមហាផ្ទៃ មិនទាន់ឆ្លើយតបមកពួកគាត់វិញឡើយ។
លោក រ៉ុង ឈុនថា ទោះបីជាអាជ្ញាធរមិនអនុញ្ញាតឱ្យតាមការស្នើសុំក៏ពួកគាត់នៅតែជួបគ្នាចំនួនដែលគ្រោងទុកផងដែរ។
លោកថា៖«តាមការពិតទៅដាក់ជូនដំណឹងថា តិចបំផុត ៤៥០ នាក់ ហើយខ្ញុំរំពឹងថានឹងលើសចំនួនហ្នឹង អាចចូលរាប់ពាន់[នាក់] ហើយខ្ញុំនៅតែបា្ររព្ធទៅតាមគ្រោងទុក[ទោះបីអាជ្ញាធរមិនអនុញ្ញាត]»។
អ្នកនាំពាក្យក្រសួងមហាផ្ទៃលោក ម៉ែន ប៊ុនរិទ្ធិ មានប្រសាសន៍ថា ក្រសួងបានទទួលលិខិតរបស់សាលារាជធានីភ្នំពេញ ពាក់ព័ន្ធនឹងសំណើរបស់ក្រុមសហជីព ហើយលោកក៏បានបញ្ជូនលិខិតនោះទៅថ្នាក់លើរួចហើយដែរ។
លោកថា៖«ខ្ញុំបានទទួលលិខិតសាលាក្រុងហ្នឹងហើយ អាលូវខ្ញុំបានធ្វើតាមបែបបទរដ្ឋបាលស្នើទៅថ្នាក់ដឹកនាំក្រសួងហើយ ចាំមើលទាល់តែថ្នាក់ដឹកនាំសម្រេចម៉េច អនុវត្តតាម។ អាហ្នឹងទាល់តែថ្នាក់ដឹកនាំសម្រេចសិន»។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាន៍ថា បើសិនច្បាប់អនុញ្ញាតឱ្យក្រុមសហជីពធ្វើនោះ លោកនឹងការពារ ប៉ុន្តែបើមិនអនុញ្ញាតទេ លោកនឹងទប់ស្កាត់។
លោកថា៖«ខ្ញុំខាងអនុវត្តច្បាប់ បើច្បាប់អនុញ្ញាតឱ្យធ្វើក្បែរដង្ហែ ខ្ញុំការពារទៅប៉ុន្តែបើអនុញ្ញាតទេ ខ្ញុំទប់ស្កាត់តែប៉ុណ្ណឹង»។
កាលឆ្នាំមុន សាលារាជធានីភ្នំពេញ បានបដិសេធសំណើរបស់ក្រុមសហជីព និងសមាគមដែលបានស្នើសុំហែក្បួនឆ្លងកាត់ទីក្រុង ដើម្បីបា្ររព្ធទិវាពលកម្មអន្តរជាតិ១ ឧសភា នេះ ក្រោមហេតុផលថា ដើម្បីរក្សាសណ្ដាប់សាធារណៈ ដោយកាលណោះក្រុមសហជីព និងសមាគមបានបង្ហាញការខកចិត្ត និងចាត់ទុកការមិនអនុញត្តិនោះថា ជាការរំលោភសិទ្ធិសេរីភាពសម្ដែងមតិរបស់ប្រជាពលរដ្ឋ។
យ៉ាងណាក៏ដោយ កាលពីចុងខែវិច្ឆិកាឆ្នាំមុន រដ្ឋមន្ត្រីក្រសួងមហាផ្ទៃ លោក ស ខេង បានចេញសេចក្ដីណែនាំទៅអាជ្ញាធរមូលដ្ឋានឱ្យបង្កើនកិច្ចសហការជាមួយអង្គការសង្គមស៊ីវិល។ ក្នុងសេចក្ដីណែនាំនោះលោក ស ខេង បញ្ជាក់ថា សមាគម និងអង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវនៅក្រសួងមហាផ្ទៃ ពួកគេអាចធ្វើសកម្មភាពបាន មិនបាច់ជូនដំណឹងទៅអាជ្ញាធរដូចពេលមុនៗនោះទេ៕
