កាលពីថ្ងៃទី២៦ ខែមេសា អតីតតារាសម្ដែង និង Freshies Boy លោក ថៃ នរៈវិទូ បានប្រារព្ធធ្វើខួបកំណើតវ័យ៣១ឆ្នាំ ដើម្បីប្រកាសថា លោកសម្រេចចិត្តត្រលប់មកកាន់វិថីសិល្បៈដូចដើមវិញហើយ។ នេះ ជាជំហរដែលគេទើបតែឮ បន្ទាប់ពីលោកបោះបង់សិល្បៈអស់ជិត១០ឆ្នាំ និងស្របពេលដែលលោកធ្លាប់ផ្ទុះដំណឹងអាស្រូវពាក់ព័ន្ធនឹងគ្រឿងញៀន។
អ្នកស្រី ងិន ម៉ានីយ៉ា លោក ថៃ នរៈវិទូ បានថ្លែងបញ្ជាក់ថា អ្នកស្រីធ្វើខួបអោយកូនប្រុសនៅក្នុងថ្ងៃនោះ គឺដើម្បីប្រកាសអោយមហាជនដឹងថា ក្រោយពីលោក ថៃ នរៈវិទូ មានរឿងអាស្រូវត្រលប់មកធ្វើជាបុគ្គលល្អវិញនៅក្នុងសង្គម គឺលោកបានក្លាយជាកូនល្អ ជាឳពុកល្អ និង ជាប្ដីល្អ ដែលអ្នកស្រីយល់ថា គឺដើម្បីត្រលប់មកសម្ដែងយកកេរ្តិ៍ឈ្មោះឡើងវិញ។ អ្នកស្រី បន្តថា បើទោះជាលោកធ្លាប់ដើរផ្លូវខុស ប៉ុន្តែ មិនហួសពេលនោះទេ និងគាំទ្រកូនអោយប្រលូកសិល្បៈដូចដើម។ លើសពីនេះ អ្នកស្រី អោយដឹងទៀតថា អ្នកស្រីក៏បើកក្រុមហ៑ុននាំចូលអាហារសុខភាពអោយលោក ថៃ នរៈវិទូ ធ្វើជាម្ចាស់ភាគហ៑ុនធំមួយ ដើម្បីអោយលោកទទួលបាននូវកិត្តិយសជាបុគ្គលជោគជ័យម្នាក់។
លោក ថៃ នរៈវិទូ បានអះអាងថា លោកសម្រេចចិត្តទទួលយកការសម្ដែងជាថ្មី និងប្រលូកអោយខ្លាំងមិនខុសពីកាលពីជិត១០ឆ្នាំមុននោះទេ បន្ទាប់ពីលោកយល់ថា នៅមិនទាន់ហួសពេលក្នុងការកសាងកេរ្តិ៍ឈ្មោះ។ លោកបន្តថា ជាក់ស្ដែង គ្រាន់តែលោកប្រកាសលេងៗនៅលើហ្វេសប៑ុកថា ចង់សម្ដែងដូចដើម គឺមានផលិតករទាក់ទងអោយលោកថតមួយរឿងនៅចុងខែ៥។
លោក ថៃ នរៈវិទូ ឲ្យដឹងទៀតថា លោកមិនយល់ថាការត្រលប់មកកាន់សិល្បៈ គឺជារឿងហួសពេល និងពិបាកស្វែងរកប្រជាប្រិយភាពនោះទេ បើទោះជាលោកធ្លាប់មានរឿងអាស្រូវ ដោយលោកបញ្ជាក់យ៉ាងខ្លីថា គ្មានអ្នកណាមិនធ្លាប់ខុសនោះទេ ប៉ុន្តែសំខាន់គឺកុំអោយកុំហុសនោះត្រលប់មកជាថ្មី គឺជារឿងប្រសើរហើយ។ លោកក៏បានប្រកាសទទួលថតទាំងស្ពត រឿងដុំ និងរឿងភាគទូរទស្សន៍ បើទោះជាត្រូវប្រើពេលច្រើនខែ ហើយត្រូវចុះទៅខេត្តឆ្ងាយៗ ដោយរំពឹងថា ទីផ្សារសិល្បៈនឹងល្អមិនចាញ់កាលពីមុន។
លោក ថៃ នរៈវិទូ គឺជាកូនប្រុស លោក ថៃ នរៈសន្យា ដែលមាននាទីជារដ្ឋលេខាធិការបស់ក្រសួងវប្បធម៌ និងវិចិត្រសិល្បៈ។ កាលពីដើមឆ្នាំ២០១៧ លោក ថៃ នរៈវិទូ ធ្លាប់ត្រូវបានចោទប្រកាន់
ពីបទពាក់ព័ន្ធរឿងគ្រឿងញៀននៅខេត្តបាត់ដំបង៕
