លោកនាយករដ្ឋមន្ត្រី ហ៊ុន សែន បានចាត់ទុកប្រទេសចិនជាមិត្ត «ដែកថែប» ដែលចែករំលែកនូវផលប្រយោជន៍នៃអនាគតតែមួយ បន្ទាប់ពីលោកអះអាងថា បានទទួលជំនួយជិត ៩០លានដុល្លារបន្ថែមទៀតសម្រាប់វិស័យយោធាកម្ពុជា។
លោកនាយករដ្ឋមន្ដ្រី ហ៊ុន សែន រៀបរាប់នៅលើទំព័រហ្វេសប៊ុកផ្លូវការរបស់លោកនៅថ្ងៃនេះថា ចិនបានផ្ដល់ជំនួយទំហំ ៦០០លានយន់ ឬស្មើនឹងជិត ៩០លានដុល្លារ សម្រាប់វិស័យយោធាកម្ពុជា បន្ទាប់ពីលោកបានចូលរួមក្នុងកិច្ចប្រជុំ «ខ្សែក្រវ៉ាត់ និងផ្លូវ» នៅទីក្រុងប៉េកាំង ប្រទេសចិន ដែលបានចាប់ផ្ដើមពីថ្ងៃទី២៥ ដល់ថ្ងៃទី២៧ ខែមេសាកន្លងមកនេះ។
គេហទំព័រហ្វេសប៊ុកលោកនាយករដ្ឋមន្ដ្រី ហ៊ុន សែន រៀបរាប់ថា៖ «ក្នុងនាមជាប្រទេសដៃគូយុទ្ធសាស្រ្តគ្រប់ជ្រុងជ្រោយ និងជាមិត្តដែកថែប គឺយើងជាបងប្អូនដែលចែករំលែកនូវផលប្រយោជន៍នៃអនាគតតែមួយ»។
ក្រៅពីជំនួយហើយនោះ លោក ហ៊ុន សែន អះអាងថា ភាគីចិន និងកម្ពុជាក៏បានចុះហត្ថលេខាលើកិច្ចព្រមព្រៀងសំខាន់ៗចំនួន ៦ ដើម្បីជំរុញទំនាក់ទំនងប្រទេសទាំងពីរ ដោយក្នុងនោះរួមមាន កិច្ចសហប្រតិបត្តិការក្រោមយុទ្ធសាស្ដ្រចតុកោណរបស់រដ្ឋាភិបាល និងគំនិតផ្តួចផ្តើម «ខ្សែក្រវ៉ាត់ និងផ្លូវ» ការព្រមព្រៀងនាំអង្ករកម្ពុជាប្រមាណ ៤០ម៉ឺនតោនទៅចិន អនុស្សារណៈយោគយល់គ្នាស្ដីពីបញ្ហាពន្ធគយ និងកិច្ចព្រមព្រៀងស្ដីពីបញ្ហាសេដ្ឋកិច្ច និងបច្ចេកទេស ជាដើម។
អំឡុងដំណើរទស្សនកិច្ចរបស់លោកទៅកាន់ទីក្រុងប៉េកាំងកាលពីខែមករាកន្លងមកនេះ លោក ហ៊ុន សែន ក៏បានប្រកាសឲ្យដឹងផងដែរថា ចិនបានសន្យាផ្ដល់ជំនួយដល់កម្ពុជាទំហំជិត ៦០០លានដុល្លារនៅចន្លោះឆ្នាំ២០១៩នេះ រហូតដល់ឆ្នាំ២០២១ខាងមុខ។
ទិន្នន័យដែលចងក្រងដោយអង្គការទិន្នន័យអំពីការអភិវឌ្ឍ (ODC) បានបង្ហាញថា ចិនគឺជាម្ចាស់ជំនួយធំលំដាប់ទីពីរសម្រាប់កម្ពុជាបន្ទាប់ពីប្រទេសជប៉ុន ដោយបានផ្ដល់ជំនួយទំហំជិត ១៨០លានដុល្លារមកដល់កម្ពុជានៅក្នុងឆ្នាំ២០១៦កន្លងមក។
ក្រៅពីជាម្ចាស់ជំនួយធំលំដាប់ទី២សម្រាប់កម្ពុជានោះ ចិនក៏ជាម្ចាស់បំណុលធំបំផុតផងដែរ ដោយបានកាន់កាប់ចំណែកបំណុលកម្ពុជាដល់ទៅជាង ៤២ភាគរយ ក្នុងចំណោមទំហំបំណុលជាង ១១ពាន់លានដុល្លារដែលកម្ពុជាជំពាក់បរទេស៕
