ស្នងការនគរបាលរាជធានីភ្នំពេញ អះអាងថា សមត្ថកិច្ចមិនអនុញ្ញាតឱ្យក្រុមសហជីពហែក្បួននៅថ្ងៃប្រារព្ធទិវាទពលកម្មអន្តរជាតិស្អែកនេះទេ ដោយហៅគម្រោងការហែក្បួននោះថា ជាទង្វើខុសច្បាប់។
លោក ស ថេត ប្រាប់ វី.អូ.ឌី នៅថ្ងៃនេះថា ក្រុមសហជីពអាចជួបជុំគ្នាសម្ដែងមតិតាមទីតាំងដែលអាជ្ញាធរបានកំណត់នៅថ្ងៃស្អែកនេះ ប៉ុន្តែ មិនអនុញ្ញាតឱ្យហែក្បួនទេ ដោយលោកចាត់ទុកការហែក្បួននោះថា ជាទង្វើខុសច្បាប់។
លោកថា៖ «ឱ្យតែតំណាងយកញត្តិទៅឱ្យគេទៅបានហើយ យើងចង់ហែអី វាខុសច្បាប់»។
លោក ស ថេត បន្តថា ប្រសិនបើក្រុមសហជីពនៅតែហែក្បួន អាជ្ញាធរនឹងចាត់វិធានការ ប៉ុន្តែលោកមិនបញ្ជាក់ពីវិធានការទាំងអស់នោះថា នឹងធ្វើរបៀបណាខ្លះនោះទេ។
កាលពីថ្ងៃទី៨ ខែមេសា តំណាងសហព័ន្ធសហជីព និងសមាគម បានដាក់លិខិតទៅសាលារាជធានីភ្នំពេញ ដើម្បីស្នើសុំរៀបចំប្រារព្ធពិធីរំឭកខួបទិវាពលកម្មអន្តរជាតិ លើកទី១៣៣ ថ្ងៃទី១ ខែឧសភា ដែលមានអ្នកចូលរួមជិត ៥០០០នាក់។
តាមគម្រោង សហជីព និងសមាគម នឹងជួបជុំនៅពីរទីតាំងផ្សេងៗ គឺនៅទីលានប្រជាធិបតេយ្យ និងសួនច្បារក្បែរវត្តភ្នំ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា នៅថ្ងៃទិវាពលកម្មអន្តរជាតិស្អែកនេះ ពួកគាត់នៅតែរក្សាជំហរធ្វើការហែក្បួនពីសួនច្បារមុខក្រុមប្រឹក្សាសម្រាប់ការអភិវឌ្ឍន៍កម្ពុជា ក្បែរវត្តភ្នំ ទៅកាន់មុខរដ្ឋសភា ដើម្បីដាក់ញត្តិដដែល។
លោកថា៖ «ដូចខ្ញុំនិយាយអ៊ីចឹង យើងត្រៀមហែ ប៉ុន្តែ បើហែមិនបានទេ គឺយើងអត់ហែ បើហែបាន យើងសម្រួលតាមហ្នឹង»។
លោក អាត់ ធន់ បញ្ជាក់ថា មូលហេតុដែលចង់ហែក្បួន ដោយលោកថា ថ្ងៃ១ឧសភា ជាទិវាពលកម្មអន្តរជាតិ ហើយលោកចង់ផ្សព្វផ្សាយឱ្យបានទូលំទូលាយ។
ដោយឡែក អ្នកសម្របសម្រួលមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ មានប្រសាសន៍ថា កន្លងមក ក្រុមអង្គការ សមាគម និងសហជីព ចំនួន២១ បានស្នើសុំអាជ្ញាធរជួបគ្នានៅសួនច្បារមុខវត្តបុទុម ប៉ុន្តែ អាជ្ញាធរមិនអនុញ្ញាត។ លោកបន្តថា នៅថ្ងៃទិវាពលកម្មអន្តរជាតិ ពួកគាត់នឹងនៅទីលានប្រជាធិបតេយ្យ ប៉ុន្តែ មិនហែក្បួននោះទេ។
លោកថា៖ «យើងមិនចង់ឃើញមានរូបភាពដែលប្រឈមមុខដាក់គ្នា ហើយកន្លងមក តែងតែមានការលើកហេតុផលថា ក្រុមសហជីព អង្គការ ដែលធ្វើវិស័យសិទ្ធិមនុស្ស វិស័យការងារហ្នឹង ថាយើងហ្នឹងជាផ្នែកមួយនៃការគាំទ្រគណបក្សប្រឆាំង បានយើងមិនចង់ឱ្យមានការប្រឈមមុខដាក់គ្នា ហើយមិនឱ្យមានការលាបពណ៌ដាក់គ្នាអ៊ីចឹង ដោយសារ យើងធ្វើការងារប្រកាន់គោលការណ៍ឯករាជ្យអ៊ីចឹង។ ម្លោះហើយបានជាយើងគិតថា មិនធ្វើការប្រឈមមុខដាក់គ្នាជាមួយអាជ្ញាធរទេ»។
មាត្រា៣៧ និង៤១ នៃច្បាប់រដ្ឋធម្មនុញ្ញ ចែងថា ប្រជាពលរដ្ឋគ្រប់រូបមានសិទ្ធិសេរីភាពក្នុងការជួបជុំ បញ្ចេញមតិ និងធ្វើកូដកម្ម បាតុកម្ម ដោយសន្តិវិធី ដែលមានការធានាដោយច្បាប់។
ជារៀងរាល់ឆ្នាំ ក្រុមសហជីព និងសមាគម តែងតែនាំគ្នារៀបចំបា្ររព្ធទិវាពលកម្មអន្តរជាតិ ១ឧសភា ដោយជួបជុំគ្នានៅទីកន្លែងសំខាន់ៗ ដូចជា នៅរាជធានីភ្នំពេញ ដើម្បីសម្តែងមតិ កង្វល់ និងលើកឡើងពីសំណើមួយចំនួន ដើម្បីស្នើសុំឱ្យកែលម្អលក្ខខណ្ឌការងារនៅកម្ពុជា៕
