អាជ្ញាធរអគ្គិសនីកម្ពុជាថា កម្រិតទឹកភ្លៀងនៅប៉ុន្មានថ្ងៃនេះនៅមិនទាន់បំពេញដល់តម្រូវការនៃទំនប់វារីអគ្គិសនីឲ្យបានគ្រប់គ្រាន់នៅឡើយទេ ដោយស្នើឲ្យពលរដ្ឋបន្តយោគយល់បន្តទៀត។
ប្រធានអាជ្ញាធរអគ្គិសនីកម្ពុជា លោក យឹម វិសិដ្ឋ បានឲ្យ VOD ដឹងតាមសារអេឡិចត្រូនិក Email នៅថ្ងៃនេះ ថា បើទោះបីនៅប៉ុន្មានថ្ងៃនេះភ្លៀងបានធ្លាក់នៅតំបន់វារីអគ្គិសនីមួយចំនួនក៏ដោយ តែកម្រិតទឹកភ្លៀងទាំងនោះនៅមិនទាន់ឆ្លើយតបតាមតម្រូវការរបស់ទំនប់វារីអគ្គិសនីបាននៅឡើយទេ។
លោកសរសេរថា៖ «ជាធម្មតាកន្លងមក ទោះបីអត់មានភ្លៀង តែនៅក្នុងអាងនៃវារីអគ្គិសនីមួយចំនួនមានទឹកខ្លះ ហើយបានដំណើរការ ប៉ុន្តែ ដំណើរការតិចម៉ោង ឬច្រើនម៉ោងទៅតាមស្ថានភាពទឹកជាក់ស្តែង។ ចំពោះការប៉ាន់ស្មានថា តើពេលណាយើងអាចដំណើរការផ្គត់ផ្គង់អគ្គិសនីបានពេញលេញដោយមិនមានការកាត់ផ្តាច់បានវិញនោះ គឺអាស្រ័យលើទឹកភ្លៀងជាក់ស្តែង តែយើងសង្ឃឹមថា នៅចុងខែឧសភាខាងមុខ។»
លោក យឹម វិសិដ្ឋ ស្នើដល់ពលរដ្ឋឲ្យមានការយោគយល់បន្តទៀត ខណៈអ្នកដែលយល់ថា កុងទ័រអគ្គិសនីរបស់ខ្លួននៅពេលដាច់ភ្លើងច្រើនកើនតម្លៃនោះ អាចស្នើឲ្យមន្ត្រីអគ្គិសនីចុះទៅត្រួតពិនិត្យដោយឥតគិតថ្លៃបានផងដែរ ដោយទំនាក់ទំនងទៅកាន់ហ្វេសបុកផេករបស់អាជ្ញាធរអគ្គិសនីកម្ពុជា។
បុគ្គលិកប្រតិបត្តិការ និងថែទាំនៅទំនប់វារីអគ្គិសនីសេសានក្រោម ២ លោក ម៉ា មករា បានប្រាប់ VOD ឲ្យដឹងកាលពីម្សិលមិញថា កម្រិតទឹកនៅទំនប់សេសានក្រោម ២ មានកម្ពស់ត្រឹមតែ ៧៤,៨ម៉ែត្រ ដែលអាចបង្វិលតួប៊ីនបាន ១ប៉ុណ្ណោះ ក្នុងចំណោមតួប៊ីន ៨គ្រឿងដែលត្រូវបានបំពាក់នៅទំនប់វារីអគ្គិសនីមួយនេះ។
វិស្វកររូបនេះ បានឲ្យដឹងទៀតថា ទំនប់វារីអគ្គិសនីមួយនេះ អាចផ្ដល់លំហូរទឹកត្រឹមតែជាង ៥០០ម៉ែត្រគូបប៉ុណ្ណោះក្នុងមួយវិនាទី ខណៈតួប៊ីននីមួយៗ ត្រូវការទឹកទំហំយ៉ាងតិច ២០០ម៉ែត្រគូបក្នុងមួយវិនាទីដើម្បីបង្វិល។
លោក ម៉ា មករា ប្រាប់ថា៖ «កាលណាយើងបើកបង្វិលតួប៊ីនហ្នឹងកាន់តែច្រើន ហើយលំហូរទឹកដែលចេញនោះច្រើន អញ្ចឹងទឹកហូរចូលហ្នឹងវាហូរមកទាន់យើងបញ្ចេញ ឬអត់? បើសិនជាយើងសិក្សាទៅលំហូរទឹកខាងលើ និងលំហូរទឹកដែលយើងបញ្ចេញហ្នឹង លំហូរទឹកខាងលើវាមកច្រើនជាងលំហូរទឹកដែលយើងបញ្ចេញ គឺយើងអាចដំណើរការតួប៊ីនហ្នឹងទាំងអស់បាន»។
ទំនប់វារីអគ្គិសនីសេសានក្រោម២ ដែលត្រូវបានសម្ពោធដាក់ឲ្យដំណើរការកាលពីចុងឆ្នាំមុននោះ ត្រូវបានរដ្ឋាភិបាលលោកនាយករដ្ឋមន្ត្រី ហ៊ុន សែន ប្រកាសថា នឹងអាចផលិតថាមពលអគ្គិសនីបាន ៤០០មេហ្គាវ៉ាត់ សម្រាប់ផ្គត់ផ្គង់ដល់តម្រូវការថាមពលអគ្គិសនីនៅតាមបណ្ដាខេត្តនានា និងរាជធានីភ្នំពេញ។
ប៉ុន្តែ លោក មករា ឲ្យដឹងថា ក្នុងរដូវប្រាំងនេះទំនប់វារីអគ្គិសនីមួយនេះអាចបើកតួប៊ីនឲ្យផលិតថាមពលបានតែមួយប៉ុណ្ណោះ ដែលផ្ដល់អនុភាពអគ្គិសនីបាន ៥០មេហ្គាវ៉ាត់។
លោក មករា បន្ថែមថា ទោះបីជាមានខេត្តមួយចំនួននៅកម្ពុជាមានធ្លាក់ភ្លៀងកក់ខែរួចក៏ដោយ តែសម្រាប់តំបន់ឦសានប្រទេសមួយនេះនៅមិនទាន់មានភ្លៀងនៅឡើយទេ ដែលធ្វើឲ្យទំនប់សេសានក្រោម២ មិនមានទឹកគ្រប់គ្រាន់ដដែល និងធ្វើឲ្យក្រុមហ៊ុនខាតបង់ចំណូលមួយចំនួនផងដែរ។
លោក មករា ប្រាប់ថា៖ «ស្ថានីយអគ្គិសនីមួយៗ ធ្វើមក គេមិនចង់ខាតទេ គឺគេចង់លក់ឲ្យបានច្រើនដើម្បីទទួលចំណូលបានច្រើន អត់មានអ្នកណាចង់ខាតទេ EDC ក៏គេមិនចង់ខាតដែរ ឲ្យតែដាច់ភ្លើងចំណូលគឺខាតបង់ច្រើន។ យើងក៏ដូចគ្នា យើងក៏ចង់លក់ឲ្យ EDC ឲ្យបានច្រើនដែរ តែដោយសារយើងធ្វើមិនរួច! បើសិនយើងបើកទាំង ៨តួប៊ីន គឺបានតែកន្លះថ្ងៃទេ គឺអាងស្ដុកទឹករបស់យើង គឺអស់ទឹកដែលធ្វើឲ្យមានហានិភ័យទៅលើចំណូលយើងដែរ»។
ស្ថាបនិកអង្គការមាតាធម្មជាតិជនជាតិអេស្ប៉ាញ លោក អាឡិច ហ្គន់សាឡេសដេវិតសិន បានលើកឡើងពីក្ដីបារម្ភថា ទៅថ្ងៃអនាគតពីការប្រឈមកង្វះអគ្គិសនីដូចពេលបច្ចុប្បន្ននេះ ដោយសារការបម្រែបម្រួលអាកាសធាតុដែលធ្វើឲ្យក្ដៅខ្លាំង និងមានភ្លៀងតិចនោះ។
លោកថា៖ «ឆ្នាំក្រោយ ឬក៏ពីរឆ្នាំ ប្រាំឆ្នាំទៅមុខទៀត គឺបញ្ហានេះវានៅតែដដែល ដរាបណារដ្ឋាភិបាលលោក ហ៊ុន សែន មិនផ្លាស់ប្ដូរគោលនយោបាយស្ដីពីថាមពល។»
បើតាមលោក អាឡិច រដ្ឋាភិបាលគួរមានគោលនយោបាយមួយជំរុញដល់ប្រជាពលរដ្ឋ និងក្រុមហ៊ុនធំៗឲ្យមានប្រភពថាមពលពន្លឺព្រះអាទិត្យផ្ទាល់ខ្លួន ជាពិសេសនៅថ្ងៃអនាគតគួរតែរកប្រភពថាមពលផ្សេងក្រៅពីទំនប់វារីអគ្គិសនីវិញ។
កាលពីថ្ងៃទី១៦ ខែមីនា លោកនាយករដ្ឋមន្ត្រី ហ៊ុន សែន បានប្រកាសថា បញ្ហារាំងស្ងួតក្នុងរដូវប្រាំងនេះ បានធ្វើឲ្យកម្ពុជាប្រឈមកង្វះថាមពលអគ្គិសនីប្រមាណ ៤០០មេហ្គាវ៉ាត់ សម្រាប់យកមកបំពេញតម្រូវការក្នុងស្រុក ដោយលោកសុំឲ្យពលរដ្ឋយោគយល់ ខណៈស្នើដល់អ្នកដែលមានលទ្ធភាពឲ្យទិញម៉ាស៊ីនភ្លើងយកមកប្រើប្រាស់បណ្ដោះអាសន្នផងដែរ៕