តុលាការខេត្តកោះកុងសម្រេចចេញដីកាកោះហៅស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវិតសុន ដែលត្រូវបានរដ្ឋាភិបាលបណ្ដេញចេញកាលពីឆ្នាំ២០១៥ ឲ្យចូលសវនាការថ្ងៃទី៣០ ខែកក្កដា។
ក្នុងដីកាកោះហៅ ចុះថ្ងៃទី២៥ ខែមេសា តំណាងរាជអាជ្ញាសាលាដំបូងខេត្តកោះកុង លោក អ៊ីវ ត្រាយ បានកោះហៅលោក អាឡិច ហ្គន់សាឡេស ដេវិតសុន ឲ្យចូលបំភ្លឺនៅថ្ងៃទី៣០ ខែកក្កដា ឆ្នាំ២០១៩ ម៉ោង៨ និង៣០នាទីព្រឹក ដើម្បីឆ្លើយបំភ្លឺទាក់ទងនឹងបទចោទ សមគំនិតក្នុងអំពើគំរាមកំហែង ថានឹងធ្វើឲ្យខូចខាតតាមមាត្រា២៩ និង៤២៤នៃក្រមព្រហ្មទណ្ឌ ដែលបានប្រព្រឹត្តនៅក្នុងឃុំអណ្ដូងទឹក ស្រុកបុទុមសាគរ ខេត្តកោះកុង កាលពីថ្ងៃទី២៦ ដល់២៨ ខែកក្កដា និងពីថ្ងៃទី១២ ខែសីហា ឆ្នាំ២០១៥។
លោក អាឡិច ហ្គន់សាឡេស ដេវិតសុន បានឲ្យ VOD ដឹងពីប្រទេសអេស្ប៉ាញ ថា លោកនៅតែរក្សាជំហរដើម្បីចូលរួមនៅក្នុងសវនាការនេះ តែលោកសួរទៅរដ្ឋាភិបាលវិញថា តើហ៊ានអនុញ្ញាតឲ្យលោកចូលវិញដែរឬអត់នោះ។
លោកថា៖ « ខ្ញុំនឹងដាក់ពាក្យស្នើសុំ Visa មួយដងទៀត ដែលជាលើកទី៥ទៅសម្ដេច ស ខេង ដើម្បីឲ្យគាត់លុបឈ្មោះខ្ញុំចេញពីបញ្ជីខ្មៅ ទើបខ្ញុំអាចសុំទិដ្ឋាការបាន។ ព្រោះបច្ចុប្បន្ននេះ បើសិនជាខ្ញុំសុំទៅ គឺគេមិនឲ្យទេ អញ្ចឹងបើសិនជាអត់មានវីសា ឬឈ្មោះខ្ញុំក្នុងបញ្ជីខ្មៅហ្នឹង ខ្ញុំក៏មិនអាចមានឱកាសទៅខ្មែរវិញដដែលហ្នឹង » ។
កាលពីចុងឆ្នាំ២០១៨ រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា បានប្រាប់ទៅប្រធានសាលាដំបូងខេត្តកោះកុង ឲ្យត្រួតពិនិត្យទៅលើភាពអសកម្មលើសំណុំរឿងរបស់សកម្មជនបរិស្ថានរូបនេះ បន្ទាប់ពីសំណុំរឿងប្រឆាំងលោកអាឡិច ត្រូវបានជាប់គាំងតាំងពីខែវិច្ឆិកា ឆ្នាំ២០១៥មក៕